Последование святаго елеа,
совершаемое поскору Священник, облечен в епитрахиль и поручи (аще возможно, то и в фелонь), начинает: Благословен Бог наш всегда, ныне и присно и во веки веков.
И начало обычное.
Посем Аллилуиа, глас 6.
Стих 1: Господи, да не яростию Твоею обличиши мене, ниже гневом Твоим накажеши мене.
Стих 2: Помилуй мя, Господи, яко немощен есмь.
И тропарь, глас 4: Скорый в заступлении един сый, Христе, скорое свыше покажи посещение страждущему рабу Твоему (или страждущей рабе Твоей), избави недугов, и горьких болезней; воздвигни во еже пети Тя и славити непрестанно, молитвами Богородицы, Едине Человеколюбче.
Таже:
Миром Господу помолимся.
Господи, помилуй.
О свышнем мире и спасении душ наших, Господу помолимся.
Господи, помилуй.
О мире всего мира, благостоянии Святых Божиих Церквей и соединении всех, Господу помолимся.
Господи, помилуй.
О Великом господине и отце нашем Святейшем Патриарсе КИРИЛЛЕ, и о господине нашем (высоко-)преосвященнейшем митрополите (или: архиепископе, или: епископе) имярек, честнем пресвитерстве, во Христе диаконстве, и о всем причте и людех, Господу помолимся.
Господи, помилуй.
О еже благословитися елею сему силою и действом и наитием Святаго Духа, Господу помолимся.
Господи, помилуй.
О рабе Божии (или: о рабе Божией) имярек, и о еже в Бозе посещении его (или: ея), и еже приити на него (или: на ню) благодати Святаго Духа, Господу помолимся.
Господи, помилуй.
О еже избавитися ему же (или: ей же) и нам от всякия скорби, гнева и нужды, Господу помолимся.
Господи, помилуй.
Заступи, спаси, помилуй, и сохрани его (или: ю) и нас, Боже, Твоею благодатию.
Господи, помилуй.
Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Тебе, Господи.
И абие иерей влагает вино (или воду) в елей, благословляет его и глаголет молитву:
Господи, милостию и щедротами Твоими исцеляяй сокрушения душ и телес наших; Сам Владыко, освяти елей сей, якоже быти помазующимся от него во исцеление, и в пременение всякия страсти, скверны плоти и духа, и всякаго зла; да и в сем прославится Твое Пресвятое Имя, Отца и Сына и Святаго Духа, ныне и присно и во веки веков, аминь.
Таже: Вонмем. Мир всем.
И духови твоему.
Премудрость.
Прокимен, глас 1: Буди, Господи, милость Твоя на нас, якоже уповахом на Тя.
Стих: Радуйтеся праведнии о Господе, правым подобает похвала.
Премудрость.
Соборнаго послания Иаковля чтение (зачало 57)
Вонмем.
Братие, образ приимите злострадания и долготерпения, пророки, иже глаголаша именем Господним. Се блажим терпящия: терпение Иовле слышасте, и кончину Господню видесте, яко многомилостив есть Господь, и щедр. Прежде же всех, братия моя, не кленитеся ни небом, ни землею, ни иною коею клятвою. Буди же вам, еже ей, ей, и еже ни, ни: да не в лицемерие впадете. Злостраждет ли кто в вас: да молитву деет. Благодушствует ли кто: да поет. Болит ли кто в вас: да призовет пресвитеры церковныя. И да молитву сотворят над ним, помазавше его елеем во Имя Господне. И молитва веры спасет болящаго. И воздвигнет его Господь, и аще грехи будет сотворил, отпустятся ему. Исповедайте убо друг другу согрешения, и молитеся друг за друга, яко да исцелеете: много бо может молитва праведнаго поспешествуема.
[ Мир ти.
И духови твоему. ]
Аллилуиа, глас 8.
Стих: Милость и суд воспою Тебе, Господи.
Премудрость, прости. Услышим святаго Евангелия.
От Марка святаго Евангелия чтение (зачало 23).
Слава Тебе, Господи, слава Тебе.
Вонмем.
Во время оно, призва Иисус обанадесяте, и начат их посылати два два: и даяше им власть над духи нечистыми. И заповеда им, да ничесоже возьмут на путь, токмо жезл един: ни пиры, ни хлеба, ни при поясе меди: Но обувени в сандалия, и не облачитися в две ризе. И глаголаше им: идеже аще внидете в дом, ту пребывайте, дондеже изыдете оттуду. И елицы аще не приимут вы, ниже послушают вас, исходяще оттуду, оттрясите прах, иже под ногами вашими, во свидетельство им. Аминь глаголю вам: отраднее будет Содомом и Гоморром в день судный, неже граду тому. И изшедше проповедаху, да покаются: и бесы многи изгоняху. И мазаху маслом многи недужныя, и исцелеваху.
Слава Тебе, Господи, слава Тебе.
И ектения:
Помилуй нас, Боже, по велицей милости Твоей, молим Ти ся, услыши и помилуй.
Господи, помилуй, трижды.
Еще молимся о милости, жизни, мире, здравии, спасении, посещении и оставлении грехов раба Божия (или: рабы Божией), имярек.
Господи, помилуй, трижды.
О еже проститися ему (или: ей) всякому согрешению, вольному и невольному, Господу помолимся.
Господи, помилуй, трижды.
Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Аминь.
И молитва:
Владыко Вседержителю, Святый Царю, наказуяй и не умерщвляяй, утверждаяй низпадающия, и возводяй низверженныя, телесныя скорби исправляяй человеков; молимся Тебе, Боже наш, яко да наведеши милость Твою на елей сей, и на помазующияся от него во Имя Твое: да будет им во исцеление души же и тела, и во очищение и изменение всякия страсти, и всякаго недуга, и язи, и всякия скверны плоти и духа. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть, и всякую немощь таящуюся. Буди врач раба Твоего (или: рабы Твоея) имярек, воздвигни его (или: ю) от одра болезненнаго и от ложа озлобления цела и всесовершенна (или: целу и всесовершенну), даруй (или: ю) его Церкви Твоей благоугождающа и творяща (или: благоугождающу и творящу) волю Твою.
Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.
И по молитве вземлет иерей стручец и, омочив и во святый елей, помазует болящаго крестообразно: на челе, на ноздрях, на ланитех, на устех, на персех, на руках на обе стране, глаголя молитву сию:
Отче Святый, Врачу душ и телес, пославый Единороднаго Твоего Сына, Господа нашего Иисуса Христа, всякий недуг исцеляющаго и от смерти избавляющаго, исцели и раба Твоего (или: рабу Твою) имярек, от обдержащия его (или: ю) телесныя и душевныя немощи, и оживотвори его (или: ю) благодатию Христа Твоего. Молитвами Пресвятыя Владычицы нашея Богородицы, и Приснодевы Марии: предстательствы честных Небесных Сил безплотных: силою Честнаго и Животворящаго Креста: честнаго славнаго пророка, Предтечи и Крестителя Иоанна: святых славных и всехвальных апостолов: святых славных, и добропобедных мучеников: преподобных и богоносных отец наших: святых и исцелителей безсребренников, Космы и Дамиана, Кира и Иоанна, Пантелеимона и Ермолая, Сампсона и Диомида, Фотия и Аникиты: святых и праведных богоотец Иоакима и Анны: и всех святых.
Яко Ты еси Источник исцелений, Боже наш, и Тебе славу возсылаем, со Единородным Твоим Сыном, и Единосущным Твоим Духом, ныне и присно и во веки веков. Аминь.
По скончании же помазания иерей, взем святое Евангелие, и разгнув е, возлагает писмены на главе больнаго, и глаголет молитву сию:
Царю Святый, благоутробне и многомилостиве Господи Иисусе Христе, Сыне и Слове Бога Живаго, не хотяй смерти грешнаго, но яко обратитися, и живу быти ему. Не полагаю руку мою грешную на главу пришедшаго (или: пришедшия) к Тебе во гресех, и просящаго (или: просящия) у Тебе нами оставление грехов; но Твою руку крепкую и сильную, яже во святом Евангелии сем, еже держу на главе раба Твоего (или: рабы Твоея) имярек: и молюся Ти, и прошу милостивное и непамятозлобное человеколюбие Твое, Боже, Спасителю наш, пророком Твоим Нафаном покаявшемуся Давиду о своих согрешениих оставление даровавый, и Манассиину еже о покаянии молитву приемый: Сам и раба Твоего (или: рабу Твою) имярек, кающагося (или: кающуюся) о своих си согрешениих, приими обычным Твоим человеколюбием, презираяй вся его (или: ея) прегрешения.
Ты бо еси Бог наш, Иже и седмьдесят крат седмерицею оставляти повелевый падающим в грехи: зане яко величество Твое, тако и милость Твоя, и Тебе подобает всякая слава, честь и поклонение, ныне и присно и во веки веков. Аминь.
Снемше же Евангелие с главы больнаго, дает целовати е.
И начинает чин, егда случится вскоре вельми больному дати Причастие.
Аще же ни, Слава, и ныне: Господи, помилуй (трижды) Благослови.
И отпуст:
Христос истинный Бог наш, молитвами Пречистыя Своея Матере; силою Честнаго и Животворящаго Креста; святаго славнаго и всехвальнаго апостола Иакова, брата Божия и перваго архиереа Иерусалимскаго, и всех святых, помилует и спасет нас, яко благ и Человеколюбец.
|
