Иван Васильев, или Венедикт, Чугуевский монах: Извещение разглагольствия, бывшаго у поморян с поповщиною, в прошедшем 1768 году Извещение разглагольствия бывшаго у поморян с поповщиною, в прошедшем 1768 году (Часть 2)

Честным отцам, Сергию Аарону Иосифу, и Пафнутию,

и братиям всем поповляньскаго согласия,

желаем мира здравия и спасения.

Пожалуйте честнии отцы и братия, разрешите наше сомнение о поповстве вашем, что бы и вам и нам было безгрешно и не мнително.

Вопрос, 1.

По каким вы правилам приимаете от Российския церкве приходящих попов под миропомазание, и кто им у вас дает власть, по миропомазании церковныя совершать таиньства, и духовную ли епископскою властию сие бывает, или токмо иерейскою.

Вопрос, 2.

При избрании и рукоположении попов ваших, вне православныя церкве бывшем, соприсудствовал ли Дух Святый, и удостоил ли их чином священничества своею силою и благодатию, и убо ли посредством неправославных епископов подается Дух Святый в рукоположении, и како сие бывает, и где о том есть написано.

Вопрос, 3.

Тойжде ли Дух Святый таинства совершает в церквах православных, и в церквах еретических, и равною ли силою и благодатию семо и онамо действует, покажите на се свидетельства от Божественнаго писания.

Вопрос, 4.

Святый Киприан священномученик к различным лицам в посланиях; и в синодальном заседании; Афанасий Александрийский, в слове окружном на Ария; и в толковании на первое правило Великаго Василия; Златоуст ко ефесяном в 11-м, нравоучении на схизматиков; Максим Исповедник, к единоволникам [Четь минея, в житии его]; Иоанн Никийский в слове обличителном на арменов; Матфей правилник во главе 2, перваго состава на наватианов; Никон Черногорский в 63-м слове на них же; в десятом послании Мелетиевом лист 505 [Кирилова старопеч.]; в Великом Катихисисе во главе 4, и 25; Зиновий Отни пустныни в 37-м слове; и в Соборнице малом лист 122; Иосиф Волоколамский в послании, к Нифонту епископу Суждальскому, на новогородских еретиков и отступников; во всех сих и других писаниях, на многих местех сказано, что в еретицех Дух Святый не пребывает, и тайны не действуют. А напротив того еще живет в них дух сатанин, и дух диаволь. И вы верите ли сему писанию, или нет. И в том же ли смысле оное приемлете, или во ином, открыйтесь нам о всем том простою мыслию, како вы сия разумеете, и содержите.

Вопрос, 5.

И аще тако есть, яко же и есть, что попы ваши в крещении у еретиков, дух оправдания, или оставления не приняли и в миропомазании печатию его не назнаменашася. и в хиротонии благодатию его не освятиша. то кто же они таковии суть, иже без Бога и благодати Его вся церковная смеют действовати, а наипаче еще и без повеления архиерейскаго. аще бо они от своих архиереов Синодом от тела церковнаго отсечены и извержены, а во общество ваше правилно в чин священничества чрез православнаго епископа не сочеташася [зри о сем печ. собор. свиток]. убо и быша яко ничтоже имуще от перьваго рукоположения и достояше им, яко простолюдином отнюд не дерзати что над законы церковныя, аще ли же дерзнуша, убо, яве яко вся погубиша, яко любоначалия питатели, и законов церковных разорители. тем же и отпадоша гражданства небеснаго, и честнословия христианскаго. аще ли же вам сие возмнится дерзостно быти, просим просветить нас божественным писанием.

Вопрос, 6.

Кроме епископа православнаго может ли поп, пришедшаго от еретик иерея, не предсовершеннаго благодатию Святаго Духа в хиротонии, удостоить в чин священничества; и есть ли на сие свидетельства от правил церковных, или примерныя образы; и что есть сила и мощь иерейская, и до коих степеней простирается; и на которыя таиньства действует; и от себе ли он испущает дары благодатныя; или от вне приемлет. и како приемлет. и от кого и когда приемлет, скажите истину.

Вопрос, 7.

Пишет святый Дионисий Ареопагит, во второй книге о священноначалии, яко священноначалническаго чина сила, во вся вмещается священная всемствия, и всеми священными чиньми той действует своего священноначалия таиньствия, священник же световный чин есть. тем же и службодействия своя на священноначалника вспущает, и возносит тому бо вся действия их навершавающу и священнодействующу Христовою благодатию. попы же ваши чьею силою, и коего архиерея священием подлежащая им тайнослужения священнословствуют, и на ково вспущают, или возносят действ своих накончавательная. Желаем от вас и о сем ясными свидетельствы увериться с доказательством слова Божия.

Вопрос, 8.

Тожде пишет и Симеон Фессалонитский в книзе своей во главах 77, 157 и 187, яко вся церковная единый действует епископ. чрез него же яко от источника света вся церковная совершаются. Священник же не предприем от архиерея, ничтоже может в Дусе действовати. и вы о сем такоже ли умствуете, яко же есть писано. и чесо ради священник без архиерея ничтоже в Дусе может действовати; и кая есть сила епископская, яже вмещается во вся священная всемствия; и без нея можно ли священником что ни есть действовать от церковных тайнословий, просим и на се правильнаго разрешения.

Вопрос, 9.

Попы ваши почитают ли своих архиереов, от них же рукоположишася, за причину действующую вся церковная таиньства; ибо в толковании апостольскаго, 55 правила речено бысть [Кормчая, лист 15]. презвитери и диякони по образу суще рук, ими же епископ яко глава церковнаго телесе действует, всецерковное правление. по сему апостольскому правилу, не будет ли тело священьства вашего безглавное. ибо руки то есть презвитери ваши действуют церковная таиньства. кроме силы и благодати подаемыя от епископа. что совсем противно есть, естественному порядку, и церковному благочинию. и аще мы о сем предложили вам неправилно, то извольте подлиннее уразуметь сами, и по довольном разсмотрении, сообщите мыслей ваших определение.

Вопрос, 10.

Тридесять же девятое апостольское: и четыредесят третие Карфагенскаго собора правила, отнюд не повелевают презвитерам ни нужди нашедшей: кающимся противу грехов давать запрещения, ниже ино что от дел церковных творити без воли [повеления], и писания епископскаго. о чем в самых тех правилах в книзе Кормчей на десятом, и на 134-м, листах, пространнее имеется напечатано. попы же ваши что ради преступают, сию апостольскую заповедь, и святых отец предания, яко не данною им властию от православнаго епископа связуют и разрешают впадающих в согрешения, и не будут ли они за сие и прочее подвержени оному церковному правилу; и безчестному наименованию иже без повеления и заповеди святительския действующии. подобно суть согрешению нерукоположне действующим ложным священником; от них же ни глас божественный, ни дела священная могут быти, что [о чем] в Потребнице старопечатном изъяснителнее объявляется. яко дело сие не токмо беззаконно есть, но и зело безбожно именуется, горее бо самых тех нечестивых бесов сии бывают. иже на священная, не священне действуют. аще ли же наношение сие возмится вам быти неправильно и болезнено; то благоволите по многом разсуждении нас известнее уверить: что попы ваши отнюд не подлежат в продерзании своем оному церковному наказанию, и оглаголанию.

Вопрос, 11.

Аще который архиерей крещен бысть в еретицех, не в три погружения, но поливанием. и вы таковаго во общество свое с тем же крещением приемлете. и повелеваете вся церковная действовать, или изнова трикратным погружением очищаете. и тако удостоиваете его церковному священнословию:

Вопрос, 12.

Поливателное крещение ныне в еретицех кроме всякия нужды деющееся. вы почитаете ли оное за крещение истинное. и аще кто имея на себе крещение поливателное, поставит кого в попа, или диакона, и вы тое действие его приемлете ли за правильное и законное; и аще приемлете; то по каким правилам приемлете, аще ли же отмещете; то чесо ради от архиереов поливанцов попов у себе имеете.

Вопрос, 13.

От коего времене начали вы принимать к себе попов обливанцами поставленных; и аще по правилному ссуждению произведены они были от непросвещенных святым крещением: то како могут они совершать церковныя таинства на своих игралищах. судите сие праведно. и хотя позде некогда престаните раздражать небеснаго Бога, таковым законопреступлением: но будите единомыслени и согласни со святыми отцы, во всех их благочестивых преданиях, отчего вскоре узнаете, что есть истина Божия яже держащихся ея свобождает от временннаго и вечнаго наказания.

Вопрос, 14.

При сем еще вопрошаем мы вас, аще кто от православных христиан, гнушаяся еретическаго смрада, не приемлет от них крещения, яко же поливательнаго, тако и трехпогружателнаго, но изнова будет таковых крестить истинным христианьским крещением, сицевый какому суду от древлеправославныя церкве подвергается. покажите на се церковная правила.

Вопрос, 15.

В древния времена мнози правовернии и святии мужи еретиков аще и в три погружения крестившихся, изнова перекрещивали, и другим действуемое крещение от еретиков принимать не советовали. за сие были ль они подвержены какому либо церковному наказанию. и тогдашния христиане называли их за то христораспинателями, [трехпогруженцов крестили и крестить узаконили Киприян священномученик собором, Афанасий Александрийский, и Василий Великий, Иоанн Никейский и прочии] яко же вы ныне болезнующе о крещении еретическом, нас не приемлющих крещения их называете, пожалуйте о всем том докажите нам правильно что ради неповинно и беззаконно нас злословите.

Разсмотрение краткое от книг старопечатных и новоизданных.

Предисловие.

Благочестивому читателю предлагаются здесь на разсмотрение избранныя кратко от книг старопечатных, и новоизданных две таблицы, их же прочитая удобно познать можешь, нынешних и древних учителей, о предложенных вещах церковных умствование. Я мню что прочетши вы сии между собою противителныя таблицы вскоре уразумеете трудившагося в сем малом деле доброжелателное намерение, а познав сие не будете столь предосудительны дабы не отдать первенства и почтения достойно похвалной древности, засвидетельствованной великими людьми при содействии Святаго Духа. Да оное же самое может служить вам еще и к распознанию учинившагося несогласия между российскими народами. от числа 1666-го, где ясно увидите, от следующих предложений, на которой стране истина содержится. А когда сие, по довольном разсуждении, истинно уразумеете, то не сомневаюсь я, что при помощи Божией, будете вы находиться в числе тех правоверующих христиан, которые веру свою и жительство, и обычай утвержают на незыблемом основании слова Божия, и на душеспасительном предании святых отец. Им же устав есть слово Божие. советующее не прелагать пределы вечныя. и прочая. Добро убо и воистинну добро, и всякаго оглаголания свободно есть тое учение, кое происходит не от своего прихотения, и развращеннаго пожелания, но от перваго благаго начала, яко от источника живаго исполневающаго причащающихся ему вечнаго живота. От коего источника божественных вод пити завещавает нам и блаженный Златоуст, в слове о вочеловечении Господни сице глаголя [Маргарит старопечат. лист 468]: не изыдем ко иному источнику, но от пророческих, и апостольских приснотекущих струй безсмертных рек воды божественныя почерпаем пресвятаго учения, егда бо кто божественная вещает от Божиих, яко от живаго источника живыя почерпает воды, по реченному [Иеремия 2 и 17, Исаия 12]: Мене оставиша источника воды живы. И паки: почерпните воду с веселием от источник спасения. аще бо оставльши спасение: работаем человеческим мыслем, оно разумевающе яже помысл подлагает, обретаются наши воды учения, пустыни воды, а не живыя воды. яко же глаголаше блаженный Иеремия во Иеросалиму: разширил еси пути своя на водах пустыни, и да явит яже глаголет наведе: в похоти своих помысл исполняя, а не Божия ища. на водах пустыни заблуждают, и ничтоже сице церковную безвести творит доброту, яко же желание человеческих помысл утвержати. сего ради Павел о еретицех глаголет [Тимоф., 297]: по своих помыслех изберут себе учителей. дозде Златоуст.

Сие святаго и великаго мужа правило должно почесть за самое наилучшее средство к распознанию добраго и злаго учения; ему же добре творите внимающе [2 Петра, гл., ст. 19], яко светилу сияющу в темне месте, дондеже день озарит, и денница восияет в сердцах ваших, аминь.

Древние, 1.

Родит же Сына и наречеши имя Ему Iс: Той бо спасет люди своя от грех их. [Мф. гл. 1].

Новые

Родит же Сына и наречеши имя Ему Iис. Той бо спасет люди своя от грех их. [Мф. гл. 1].

Древние, 2.

Сего ради сим именем наречеся Iс [Благовестник], Iс бо несть имя еллинско но еврейско, еже есть еллинским гласом сказуется Спас: Спас же яко спасая люди своя. [Златоуст на Мф.. в старопечатн. Благовестнике лист 14].

Един есть Iс Христос [Кирил. старопеч.], имя чюдно: пророки провозглашаемо. глаголет бо Исаия се Спас тебе приидет имы с собою мзду. Спас же еврейски Исус сказуется. Iс же наречеся не человеки, но ангелом [Кирил Иеросалимский оглашен. 9. в древлеписм. книге]. Сие есть имя Iс. Ему же поклоняется и припадает всяко колено небесных и земных и преисподних. Сие есть имя Iс, Его же аще кто призывает без сомнения духом и истинною спасен будет. сие есть Iс имя, о Нем же аще кто что просит от Отца небеснаго, вся приемлет. Сие есть имя Iс, Его же подобает всем верным присно имети в сердцех и во устех и во всех делех своих, по апостолу Павлу глаголющему. аще что творите словом, или делом вся во имя Iса творите, благодаряще Бога и Отца онем тем божественным именем имамы избавление прияти и вся враги наша противныя победити. [Катихизис старопечат. глава 1].

Новые

Понеже ино знаменует Iис, ино же Ic. Iис толкуется с еврейскаго языка Спаситель. с греческаго же Исцелитель. Iс же что знаменует внемлите: по гречески "iсос". по нашему глаголется равный, "ус" же глаголется ухо, та два речения егда в едино место сложиши, будет Iс, еже глаголется равноухий. но не буди нам тако нарицати Христа Спасителя нашего. в российском же языке раскольщики в две токмо силлабы глаголюще Iсус, не исповедуют Спасителя и Исцелителя душ наших. и вправду в них ин Iс. не истиннаго бо Iиса Спасителя и Исцелителя исповедуют. но некоего Iсуса равноухаго. ин бо обретеся в них Iс глаголемый равноухий.

И таковы оставивше Iиса Спасителя. осталися при Iсусе равноухом [Обличение лист 82]. иже безумным упрямством своим таковое имя Спасителю еже не спасителя, но равноуха знаменует [выше лист 81]. причитаете ибо Iс без иты ни еврейско ни еллинско есть имя [лист 82 на обороте]. но новоявльшийся еретик Мартын мних арменин повелеваше писати сице Iсус. [Пращица в соборн. деян., лист 7 или 19, ересь, 15]

Древние, 3.

Погрузивый во струях иорданских пищи потока Iса Жизнодавца. [Октай глас 1. во вторник на утрени песнь 4].

Во главу усечен бысть без правды Блаженне, погрузивый главу Христову в водах. [песнь 8. того же дне].

В реце бездну иногда Всемудре погрузив поток содевающую благодатию всего преступления. [Октай глас 2, во вторник на утрени, песнь 1].

Новые

Елико же паки внидет в воду и погружаются до онаго места [Грамота Досифея патриарха Иеросалимскаго, зри тамо ответ 50. статия 35]. и прочая места крещает священник своима рукама. крещаются яко же и Христос во Иордане крестися и вниде во струи и Предотеча рукама приемля своима от струй воды. и крести прочая части того святаго тела которыя не были в воде. Грамота послана 1682 лета.

Древние, 4.

И слава ливанова к Тебе приидет кипарисом и певгом и кедром. [Исаия глава 60].

А Исаия откуду было [Маргарит нов. глава 47. Камень веры часть 1 глава 4, лист 205]. и яковые креста древеса были, именует тыми словесы. на кипарисе и певге и кедре вкупе месце святое прославите. [Златоуст в слове в неделю 3 Поста].

Крест Христов от кипариса и певга и кедра сложение имать, ибо простое его от кипариса бяше, прекое же от певга, подножию же от кедра. [Григорий Амирит. в беседе 3. в житии его].

На кипарисе и певге и кедре вознеслся еси Агньче Божий, да спасеши покланяющияся, вольному Твоему распятию. [Октай глас 3, в пяток на утрени, сед.].

Константина вернии с материю почтем. иже пророка и тии словеса послушающе на кедре, и певге и кипарисе тресложный крест уведеша. [Минея служебная, маия 21 день].

Четвероконечный мир днесь освящается, четверочастному воздвизаему Твоему кресту Христе Боже наш. [Минея сентяб. 14. стихира на целован.].

Четыре бо части имать и крест и аще едина его часть убудет то уже своего образа не являет. [Четь минея писменная. февраля 14. в житии Кирила Философа].

Новые

Како разумети подобает оное реченное Исаием пророком [Обличение лист 37]: слава ливанова, к тебе приидет кедром и певгом и кипарисом, то есть, не крест, аки бы составленный от кедра певга и кипариса яко же возмнелося раскольщиком: но мужие премудрии и святии иже суть слава и украшение церкве Христовы сице именуются.

А Христос лице нас грешных на себе носящь [Обличение лист 34], повешен на древе. дубовом древо бо дубово, многолетное и долговременное есть. а понеже части креста Христова чрез многое время не гниют и не трупеют вероятно есть, что крест Христов из древа дубоваго составлен бе.

Нудятся раскольщики от оных слов Исаиных произвести три древа креста Господня [Обличение лист 38, на обороте], не иныя ради коея благословныя вины, но токмо сея ради. дабы им возможно было осмиконечный или [яко же глаголют выгоцкий] четыресоставный крест построити.

Но ведите яко на четвероконечном римском [Розыск лист 179], а не на осмоконечном брыньском Христос распят бысть. ибо римляне Христа распинали на своем их четвероконечном кресте, на каковом обычно им бе всех злодеев распинати, а в Россию, в брынския скиты, по осмиконечный крест не посылали.

Древние, 5.

Крещается раб Божий имярек во имя Отца аминь, и Сына аминь, и Святаго Духа ныне и присно и вовеки веком аминь. аминь же на трое толкуется аминь право, аминь воистину, аминь буди тако.

Новые

Крещается раб Божий имярек во имя Отца аминь и Сына Аминь, и Святаго Духа аминь и ныне и присно и вовеки веков аминь. Амини не токмо четыре но и три не потребны суть ко святому крещению всяк бо крестится во имя Святыя Троицы, по учению Христову, а не в три аминя [Обличение лист 28 втораго счета].

Древние, 6.

Аще который епископ или презвитер не крещает в три погружения: да извержется. Правила святых апостол.

Яко образ смерти Христовы есть крещение, треми бо погружении три дни Господня погребения знаменует крещение. [Небеса книга 4. глава 10].

Проклинаю творящих развратно святое крещение, аще и во имя Отца и Сына и Святаго Духа глаголют, но обаче крещают водою в едино погружение, инии же токмо обливают водою [Потребник Большой, лист 597, на обор.]

Проклинаю скверное крещение их обливаемое, а не погружаемое по Господню образу иже во Иордане и святыми апостолы нам преданное в три погружени, во имя Отца и Сына и Святаго Духа [Там же, лист 603 на обор.].

И тии еретицы суть иже единем погружением крещаются, а не треми, яко же православнии. [Вселен. 2 собор, прав. 8; Кормчая лист 88].

Иже бо во едино погружение крещати, во священней купели и в смерть Господню едино приглашати погружение, зловерность. и тако крещаяй да извержен будет [Кормчая лист 13 на обор. в толк. на прав. 50 св. апостол].

Приступльшии же к соборней церкви [В толк. прав. 2 вселенскаго собора на 8-е правило, лист 88 на обор.], едино погружающиися еретицы яко погани прияти да будут.

Новые

Ответствуем же ясно показуя мы приемлем крещение погружателное, не отмещем же и поливателнаго, но сие новое за равносилное, и едино неотменное исповедуем [Книга о поливателном крещении, лист 47]. ибо таинство крещения яко погружением тако и возлиянием действуемое, равночестное и равносилное есть. То как же не смешно [лист 5], что учители раскола российскаго, то есть тупые и грубые сумозброды: и единой части христианскаго исповедания не знающии, но токмо обманою простаго народа чреву своему служащии сушия атеисты, прямыя безбожники, как таковые дерзают крещение поливанием деемое отметать аки бы неправильное. Но аще силу святаго крещения разсудим [лист 22], то и вящше увидим, что как погружением, так и обливанием равне совершается тайньство и благодать Святаго Духа подается.

Тако же от латин папежским и лютеран восточной церкви соединитися хотящих крестить не подобает.

И отнюд порицати не подобает тремя ли погружении или единым младенец крещается. [книжица о поливат. крещении, печать. лист 54 на обор.]

Древние, 7.

О нем же предварив вопросил мя еси раскрыти тебе силу апостольскаго предания [книга Максима грека, глава 40. а вдруг. перев. глава 91], сиречь образа крестнаго, им же знаменаем себе вернии на всяком начале молитв наших яже к Богу. ниже: яко же убо крещением таинственне предает сия нам, апостольское предание сице и знаменованием честнаго креста вси вкупе благоверия, таиньство учит ны исповедывати таиньственне глаголю же самую Святую поклоняемую Троицу, и еже с небесе Единороднаго на землю снитие и распятие Его. совокуплением бо триех перст, сиречь палца. и еже от средняго и малаго тайну исповедуем богоначалных триех ипостасей Отца и Сына и Святаго Духа единаго Бога трое. протяжением же долгаго и средняго сшедшася два естества в Христе сиречь самого Спаса Христа исповедуем совершена Бога и совершена человека во двою существу и естеству веруемаго и познаваемаго и прочая.

Новые

Предание прияхом с начала веры от святых апостолов [Скрижаль] и святых отец и святых седми соборов творити знамение честнаго креста, треми первыми персты десныя руки, и кто от христиан православных не творит крест тако есть еретик и подражатель арменов, и сего ради имамы его отлучена от Отца, и Сына и Святаго Духа, и проклята. [Скрижаль на нечисленном листе].

Двоеперстное ваше сложение отстоит ли от латинскаго перстосложения или ни [Обличение, лист 26]: о том зде истязания или разсуждения не творим: и от латин ли вы взяли, или от иного какого горшаго черта. о том зде не изследуем. [книга Обличения глава 1, лист 26].

Приличнее им раскольщиком на своем арменьском двоеперстном сложении написати имя деммоньское на едином персте ДЕ на другом МОН тако будет на двух их перстах седети демон. [Розыск часть 2, глава 26].

Древние, 8.

Аще кто двема персты не благословляет [Стоглав глава 31]. яко же и Христос или не воображает двема персты крестнаго знамения да будет проклят святии отцы рекоша. и прочая. [Стоглав глава 31].

Яже не крестит двема перстома яко же Христос да будет проклят. Потребник Бол. глава 79, лист 659.

Новые

Проклинаю еретиков армен не творящих крестнаго знамения треми первыми персты но слагают первый перст с двумя последними и творят крест двумя персты указателным и средним да будут прокляти [Пращица, ... ?, лист 25].

Проклинаю всех иже ныне не крестятся тремя первыми персты но крестятся двумя персты указательным и средним и прочих учат творити. тако да будут прокляти и анафема [Присяга печат. в чине приятия от староверов].

Древние, 9.

Яко начертанием честнаго и животворящаго креста, отгоними суть беси. и различнии недузи. вещь у всех без цены убо и без труда, и похвалу убо его кто может изчести. рече святый Ефрем. виждь сего святаго начертания святии отцы предаша нам на супротив глаголание к неверным еретиком, яко два перста убо и едина рука, являют распятаго Господа нашего Исуса Христа, во двою естеству и едином составе познаваема. [Петр Дамаскин в постнической его книге при конце].

Крест рукою воображает освящает вся [старопеч. Кирил. лист 275] на них же полагается и воду глаголю крещения и масло и миро и лица человеча верующих и тайный хлеб и священную чашу и ина вся. без того ни крещение ни литургия не бывает, ни ина кая духовная вещь [Пролог март 12, лист 64]. Аще бо и породитеся требе будет крест приходит [Златоуст, беседы на евангел. нравоуч. 54]. Аще и напитатися таиньственною оною трапезою аще и рукоположитися. ибо вся тем совершаются яже по нам. и без креста от сих ничто же право совершается [Августин в трактат 50...?].

Новые

Первый сей член раскольническаго суеверия во еже бы в знамении крестном слагати два перста средний палец с двумя последними; без котораго сложения перстов они знамение крестное ни во что ставят [Обличение глава 1, лист 4]. от чего явно зрится, что они силу знамению крестному, не от креста Христова и страдания Его на нем причитают, но от своего перстов сложения аки от волшебнаго некоего знамения.

Зрите православнии коликий смертоносный яд коликое нечестие сии злокознении мужики под осмиконечным крестом своим под своима двома перстома содержат [глава 3, лист 60]. может ли быти горший хулитель и еретик паче сих, котории бес печати трисоставнаго сиречь осмиконечнаго креста на просфирах [лист 60 обор.], и без двуперстнаго знаменования совершения безкровныя жертвы святейшия евхаристии быти неверуют аки бы не ведали [лист 1 обор.], что коим либо перстом без всякаго перстосложения крест назнаменанный истинный крест есть. дозде из книги Обличения.

Древние, 10.

Вопрос [Катихизис Бол. гл. 2, лист 6]. Без сложения триех перстов [пальца и дву последних и без протяжения назнаменования указателнаго и великосредяго] невозможно ли знаменоватися всеми персты или единым.

Ответ. Никако, тако бо знаменующиися, яко же ты рекл еси первое: не прообразуют треми персты Святыя Троицы. второе: не исповедуют двема персты двою естеству во Христе Сыне Божием божества и человечества. дозде Катихизис.

Проклинаю не истину творящих крестное начертание иже на своих лицах крест единем перстом начертают латыни яко монофилите и тако причастники ереси их обретаются и тако творяще воображают крест вне себе диаволим научением, идеже бы облещися в крест они же совлачатся его. [Потребник Бол. лист 597]

Новые

По разсуждению знамения крестнаго творимаго рукодвижением, наподобие креста Господня, на нем же распят бысть Господь наш Iисус Христос, равно сие знамение изображается аще двема, аще трема, аще единым перстом, аще целою рукою кто знаменается, ниже: и то явно и от свидетельств древних отец, котории похваляюще знамение крестное. и великую пользу его показующе. от сложения перстов сих или оных ничтоже воспоминают, и таковым о том молчанием гласят, что сложение перстов сих или оных к знамению крестному, не есть весма нужно понеже киими либо персты равно то знамение изобразуется. [книга Обличение глава 1. лист 29 и 30].

Древние, 11.

На святой проскомидии божественыя литоргии, седмь просфир да имаши. 1. за Господьский хлеб. 2. Пресвятыя Богородицы. 3. за святых. 4. за патриарха. 5. за царя. и за царицу и чад их. 6. за всех православных живых. 7. за усопших. [Потребник Бол. лист 609].

Восточный учитель святый Симеон Фессалонитский в книзе своей в главе 88 изъявляя таинство просфиры сказует [Из Поморских ответов, ответ 50 стат. 10]. Яже [рече] смотрения Спасителя во хлебе печати яже кругловидная есть и посреди ея крест и таинство кругловидности сказует глаголя безначалнаго и безконечнаго слова. воплощенна всем вкупе показующе и по нас явльшагося и воплотившагося поистине и страдавша. дозде Симеон.

Новые

В прешедших летех до правления старопечатных книг аще и служили на седми просфирах: обаче ныне на седми просфирах с воображением сицеваго креста с тростию и копием и с главою Адамовою, никто служить не будет, кроме вас противников. понеже убо в противящихся в таковых соборне восточнии патриархи: Паисий Александрийский, Макарий Антиохийский, и Московский патриарх Иоасаф и вси российстии архиереи проклятию предаша и священьства извергоша, и всякаго священнодействия весма обнажиша. и аще котории попы невежди суще вами прелщении и весма развращении ныне дерзнут тако служити от таковых собором проклятых, и изверженных не может быти сущее святое тело Христово и кровь Христова, весма. [Пращица, ответ 212].

Древние, 12.

Антимис есть плат на четыре углы, а в нем вшиты мощи святых мученик. а свящает их святитель со всем собором. а пишется на нем надписание, когда освятися и кем, имярек храму, и при коем царе и патриархе. а среди надписания воображаются крест сицевым подобием; и тако сверх срачицы, полагают священницы антимис и пришивают его на четыре углы да не како отступит от места своего таже полагают литон и святое евангелие. и покрывают святый престол. [Потребник старопечат. в чине освящения церкве. лист 20, 30 и 32 на обор.].

Новые

Коея ради вины старопечатныя книги повелевали антиминс к срачице пришивати под индитиею. а не полагати на индитии [Обличение лист 41. втораго счета]; на то не имели ни единыя благословныя вины разве для того. что б их никто не мог ведети: понеже бяху зело неблагообразны были лоскутки толстаго полотна какова и деревенския мужики на рубашки себе не употребляют разве в самой крайней нужде, и тыя лоскутки вместо подобающаго на них изображения. так нелепо вымараны что и смотрить гадко. [Обличение глава 9, лист 41].

Древние, 13.

Преподобный Максим грек в книзе своей в слове 28-м о пении аллилуия пишет сице возглашая: уставы отеческия преставляти несть твердо [ответ 16 поморян]. глаголет Соломон и апостол стойте и держите предания им же научистеся и сказоваше древнее предания. еже дважды глаголати аллилуия и в третие приглашати слава Тебе Боже во псалмоглаголании таже по сих глаголаше. како убо нецыи смеют претворити ангелы преданное сие староцерковное предание и трижды глаголати аллилуия в четвертое же приглашающе слава Тебе Боже. прельщающеся от зловерных латин.

Сия бо несть православных предания, но латинская ересь [Стоглав глава 42]. не славят бо Троицу, но четверят и Святаго Духа глаголют от Отца и Сына исходяща, и тем раболепна Святаго Духа творят и того ради не подобает святыя аллилуиа трегубити но дважды глаголати аллилуиа, а в третие слава Тебе Боже. [Стоглав глава, 42].

Новые

Лучше есть по трижды пети аллилуиа. в четвертое же приложити слава Тебе Боже. неже по дважды в двократном бо аллилуиа никако же Троица во единстве показатися может, паче же двоица токмо изображается еже есть богомерзско и противно вере православной.

Аллилуиа бо глаголати по дважды [Пращица лист 76 ответ 21], предание еретика Мартына. склоняетжеся подобием ереси македониеве понеже он ипостась третию, еже есть Духа Святаго Отцу и Сыну единосущна быти не исповедывал, но иносущна. и не Бога суща, но тварь быти глаголаше. и тако Македоний в божестве славил и чествовал точию две ипостаси, Отца и Сына, а Святаго Духа равночестие отметаше. подобно и дважды глаголати аллилуиа. будет точию ипостасем по Македонию еретику слава и честь возсылатися и такова слава зело нечестива.

Проклинаю всех таковых иже ныне глаголют по псалмех аллилуия по дважды. а не по трижды и прочих учат творити тако. дабудут прокляти и анафема [Присяга на староверов печатн.].

Древние, 14.

Священный поместный собор [Поморский ответ 50, ст. 20], бывый в лета царя Иоанна Васильевича при митрополите Макарии в книзе Стоглавнике, во главе 43, повелевает иконописцем святыя иконы писати по образу и подобию смотря на образы древних живописцев и запрещает чтоб от самосмышления своими догадками сверх древняго ничего не затевали. подобне и Иоаким патриарх Московский в духовной своей грамоте запрещает с латинских переводов иконы писати сице глаголя.

При сем еще во имени Господни завещаваю. еже бы иконы Богочеловека Исуса и пресвятыя Богородицы, и всех святых заповедали писати по древним преводам с греческих ображений какови видим и чюдотворныя иконы древних писем. а с латинских и прочих соблазненных изображений неподобственных и нововымышленных по своим похотям церковному нашему преданию развратно, отнюд бы не писати и которыи где есть в церквах неправописанныя. тыя вон износити. ибо Пресвятую Богородицу, уже обрученною мужу Иосифу праведному, и Христа Исуса родившую, они еретики пишут непокровену главу. и власы украшену, и многих святых жен непокровенными главами и мужей своестранскими обличиями. в греческих же старых и российских таковым подобием не обреташеся. и ныне того не приемлют веруем бо яко Пресвятая Богородица, Дева и по рожестве Исусовом: но церковь таковых новых видов не приемлет и необычно. [дозде Иоаким].

Новые

Собор сей не токмо стоглавным но и единоглавным не достоит нарещися [Обличение лист 146]. понеже на нем ни единыя главы имущия мозг чистый, могущия о предложенных вещах здраво разсуждати не было: и основан на единех баснех. ибо и сам не знал он иконнаго художества и знающим то не умел подать наставления [Обличение лист 20, втораго счета]. каковы богословцы были онии Стоглавнаго собора отцы показали свое неискуство [лист 12 на обор. ?], и в других своих уставах. например отметающе брадобритие глаголют: сие [брадобритие] творящии человеческаго ради угождения противящеся законом, ненавидими будете от Бога создавшаго нас по образу своему. но Бог промышлюющь о церкви своей [лист 146] не дал вкоренитися плевелам от стоглавных оных отцев посеянным. а Иоаким патриарх Московский [обличение лист 21. втораго счета] буде он таковый завет написал явно себе показал ревнителем руских деревенских мужичьих забобонов по которым жене мужатой невозможно никому явитися непокровенною главою и тем не доволен, захотел еще и Божию Матерь тому же деревенскому мужичию закону подчинити. и писать Ея образ по подобию руских бабиц. разве не ведал что Богородица не российския породы была. и не токмо по обручении Иосифу но и по рожестве пребысть дева. дозде от книг Обличения.

Древние, 15.

Благочестия рачитель и христианскаго закона истинный хранитель государь наш царь и великий князь Михаил Феодорович всея Руссии самодержец ревнуя по Святем и животворящем Дусе, и поборая по святей христианстей вере, повеле сию предобрую книгу от различных онех святых отец учиненную на различныя ереси во един куп совокупити, и яко корабль многим богатством наполнити и пустити ю во всю свою рускую землю всякому православному христианину хотящему ея прочитати и божественныя догматы ведети и та еретическая уста заграждати. воистину подобна сия предобрая книга великому кораблю, обременену великим богатьством, понеже обагащена довольно божественым писанием, на злыя еретики щит и заграда, или будет подобна велицей реце текущей широстию и напояющей всяко животно. тако же и сия книга усладит и напоит всякаго прочитающаго ю аки сладкою водою, или медвеными соты; еретиком же и расколником нашея православныя веры уста заградит. [дозде описание предобрыя книги Кириловы].

Новые

Сия книга ложно на себе имя Кириллово носит так как растрига Гришка Отрепьев имя царевича Димитрия похитил было и дураки русаки тому поверили было и приняли его себе в царя [Обличение глава 50, лист 135], с таковым же безумием и книгу ложнаго Кирилла приняли и веруют ей. уже бо видно всякому [ниже лист 138] что оная книга, нареченная Кириллова, не Кириллова, но Зизаниева есть. который по своему имени, посеял Зизания. то есть плевелы, на обман и прелесть простым людем, еже есть зело противно Богу, самой естественной истинне и доброй совести, а приятно единому диаволу, иже есть отец лжи. его же учеником соделался Зизаний. разсуди каков бе ваш раскольнический учитель Зизаний. О хитрости диавольския, о безсовестия, о безбожия лгать на святых и людей обманывать. подметный бо Кирилл не требовал ни от кого своея книги освидетельствования [лист 140 на обор.], сам ю зело выхвалив под именем святаго Кирилла на соблазн людем подкинул. сколько ты ни мый своего эфиопа Зизаний [выше лист 139]. не возможеши его бела сотворити. [дозде от книги Обличения].

Древние, 16.

Святаго отца нашего Афанасия архиепископа Александрийскаго ко Антиоху князю о множайших нужнейших взысканиих и о божественых писаниих недоведомых. от всех христиан ведати должных сей начал положен в книзе старописанней во ответах Афанасиевых. тую же книгу и преподобный муж Максим грек чести повелевает другу своему Георгию со всяким усердием. о чем в слове 18 в книзе его сице сказуется. Имаши, рече [слово 18, лист 132], ответы великаго Афанасия ко князю Антиоху, премудренныя, и всякия истины исполнены. тем внимай в тех наслаждайся, чюждая же бляди не желай, ниже ищи. зане тлят обычаев добрых беседы злы. [дозде Максим].

Новые

Да не прельщаются убо простии людие сими [Обличение глава 9, лист 18, втораго счета], аки Афанасиевыми ответами. объявляем и не хотяще, яко сии ответы ко Антиоху, не суть Афанасиевы, но некоего по шестом и седьмом соборе бывшаго легкомысленнаго мудреца, далече от разума Афанасиева отстоящаго. и воровски похитившаго на себя имя Афанасия Великаго и пречюднаго богослова. яко же похитити имя Кирилла Иеросалимскаго обманщик русаков Стефан Зизаний клирик или попишко острожский. Дивно, что российскии переводчики святых отец писания перевели подложныя, а на подлинных не кинулися. например, Афанасия сильных писаний на ариан и прочих. аки нарочно труждалися на прельщение рускаго варварскаго грубаго народа. [дозде Обличение].

Древние, 17.

Жезл, его же держит власть, знаменует Духа, и утвердительное народа и пастырственное и водити мощи, и наказати послушных, и обращати к себе далних тем, же и крюки, яко же якори имеют и еже изгонити звериных и губителных и последованно крест Христов знаменует и победоносное, в нем же и побеждаем и утверждаемся, и вождествуемся и паствимся и печатлеемся, и влечемся ко Христу, страсти умерщвляюще и супостатов изгоняем, и отвсюду сохраняемся. [Симеон Селунский во главе, 50?].

Новые

Что есть жезл архиерейский [Обличение лист 45, на обор.]. не ино что токмо знамение пастырския власти, взятое от пастухов безсловесных овец. яко же сии палки носят на исправление стад своих и на защищение их от волков, тако и пастуси словеснаго стада, змие виде иже бывает егда жестоце наказати грехи людьския нужда убеждает [Жезл правления, лист 7, на обор.]: един змий образует грехи человеческия. яже от ветхаго змия начало свое взяша, другий же змий воображает остроту наказания пастырьскаго. яже змиевидна злоботворцем явствуется. [дозде].

Древние, 18.

Бяше видети чюдо велико [Соборник старопечат. лист 866, обор.], и ужасти выше, посреде судища мученик овы гневающеся, и яко поругавшеся мучащим я горце зело; хотяще бо мучители прельстити я [выше лист 865, обор.], сия разумевше святии имены злыми и укоризнами кидающа, на болий гнев воставляют да горчайшим мучением болий дар от Христа приимут. [Златоуст в неделю всех святых].

Примеры:

В страдании от седми братий Маккавеех ко Антиоху нечестивому царю сице глаголанная. Ты же всякия злобы изобретатель быв на иудей. О беззаконниче и всех человек сквернавейше не возносися суетно кичася тщетным упованием на небесныя рабы Его возносящь руку. [2 книги Маккавейской глава 7, ст. 31 и 34].

Святый апостол Анания Лукиану игемону смертию грозящю. рече, твори еже хощеши враже Божий друже диаволов. слышал бо еси многажды яко не поклонюся богом твоим. [Четь минея октябрь, 1 день, в житии его].

Святая мученица Харитина, Домитиану комиту: хитр еси о судие, лукав и неправеден, но ничтоже успеет та хитрость твоя. ниже советуй ты яже суть тебе полезная. и не поклоняйся бездушным идолом да не погибнеши с бесы их же яко боги чтеши. [Четь минея октябрь, 5].

Святый мученик Сергий Антиоху игемону: Се имаши власть на теле моем во еже мучити е. на души же моей не имаши власти ни ты ни отец твой сатана. [октябрь, 7 день].

Святый мученик Пров Нумерию Максиму Анфипату: ни огнь ни муки ни отец твой сатана отторгнути возможет раба Божия от исповедания Его. [тамо же октябрь день 12].

Святый мученик Василий Асклепиада воеводу укори глагола: почто зверообразне отступити велиши от Бога жива. [Пролог старопечат. март, в 3 день].

И аще кто хощет о сем более ведети той да прочтет жития святых мученик в церковной истории, в четь минеях, и в Пролозе, где обрящет безчисленно, подобных вышеобъявленному верно, мужественных мученических к мучителем глаголов. Списатели страданий мученических быша мужи святии, и во учителех церковных именитии. о них же зри положенный реэстр в начале четь минеи в сентябре и декабре месецах.

Новые

Аще который страдалец хулит [книжица печат. Санкт.-Петерб, толк. блажен. лист 130], и безчестит судию мучителя, той како последует стопам Христовым, не последуя же Христу, како может законный мученик быти, како венца небеснаго за несообразное Агньцу Божию страдание свое надеятися может. и отсюду несумненно ведает, что где во историах написано како мученик укорял и безчестил мучителя повести таковыя ложныя суть. и не делалося так, как пишется. но легкомыслении и неискуснии писателие по своему мнению и мечтанию написали от себе и на святыя мученики злая, но себе мнимая добрая деяния налгали. ниже [лист 132]: невежи бо злобнии и гордии, читать толко грамоты изучившиися, мечтают о себе что суть они уже совершении мудрецы не знающе же что разумеется во имене сем писание божественное. кую либо тетрать, аще и пребезумно составленую, нарицают божественным писанием. и когда набредут на некия повести о мучениках недостоверныя [яковых в разныя темныя времена без числа наплетено], и увидят. что будто страдалец хулително и укоризненно кричал на властей, услаждаются тем, яко мужественным некиим по мнению своему дерзновением, и аки бы Илииною ревностию. и тот час и в самих себе подобный пламень ощущают. и тако когда позовет случай, часто же таковаго случая и нарочно ищут, тогда слепою на муки отвагою вооружившеся безстудно гремят лаями и укоризнами на властей и тако они окаяннии мужественно в пропасть адскую летят и многим прочим путь погибелный показуют. О окаяннии сумозброды [выше лист 128], мало таких бешаными нарицати: есть се некое зло равнаго себе имене не имущее. едино нечто подобное сему имеем в языческой истории. безделник некто от дрождей нижайшаго народа, именем Ирострат, возжелав себе славы в последния веки, добродетелию же оноя снискати не могий, зажегл преславный во всем мире храм Ефеский, дабы тако имя его вошло во истории. того ради всех непритворно Бога ищущих от всего усердия молим зде [ниже лист 133] не смотри убо что невежди величавии баснотворят что некии недостовернии поздних лет писатели плетут, но что неложное священное писание учит. [дозде ис книжицы о блаженствах].

Древние, 19.

Просящему у тебе дай и хотящаго от тебе заяти не отврати. [Мф. глава 5].

Иже бо заграждает уши своя еже не услышати нищаго молитвы, его не услышит Бог. но прелестник рече есть. что глаголеши, о человече, ради единаго ли хлеба и ризы лестьца нарицаеши [Златоуст ко евреом нравоучю 11, лист 2880. ниже лист 2882]. аще бо просил бы талант злата и сребра или ризы многоценныя или рабы или ино что [ниже лист 2884], в лепоту некто сего рекл бы лестьца. аще ли ничто же сих, но пищу и покров яже суть любомудрия сие ли льстеца рцы ми. престанем безвременнаго сего любопытства сатанинскаго губительства. [к римл. нравоуч. 14. лист 258]. Разорим убо суровство сие отженем зверство. [выше лист 256]. Не трепещеши ли о человече не срамляешилися притворителя о хлебе нарицая. аще же притворение сей творит и лицемерует сего ради и помилова быти достоин есть зане тако гладом стесняется яко в таковую облещися личину, и сей бо грех нашего суровства есть. понеже удобне подаяти не хощем, безчисленныя умыслити понуждаются козни, яко же наше ухитрити безчеловечие и жестокость умягчити. не будем убо иным прегорцы судии [ниже лист 257], да не истязани будем. ибо имамы согрешения прощения всякаго большая тем же оныя наипаче помилуем иже непростительне согрешающия. яко да и сами таковую себе предизберем милость. да не убо на ся вещаем. но аще и лености ради, аще и праздности ради приходит, мы подаем. ибо и мы многая за леность согрешаем и не истязует Бог абие от нас муку. [ко евреом. нравоуч. 11, лист 2884]. Будем милостиви не просто, но яко же Отец наш небесный. Той и прелюбодеев и блудников и чародеев питает, и что глаголю, всяк вид злобы имущих в толицем бо мире нужда быти, и сицевым многим. [дозде Златоуст].

Се бо есть чистота крайнейшая еже имети сердце милостиво о всякой твари и во времена нужды [книга Никона Черногорца. от Исаака Сирина]. и милостыни не подобает испытовати верна или не верна. но миловати вся человеки. и самой той миловати птичий род и животных и гадов и самыя яко же рещи ущедряти бесы и всяку тварь по подобию Божию. [Слово 26. в Никонове книге].

Новые

О подаянии милостыни должно коллегиум духовно сочинить наставление, ибо в сем не мало погрешаем. многия безделники при совершенном здравии, за леность свою, пускаются на прошение милостыни, по миру ходят безстудно, и иные же в богаделни вселяются, посулами у старосты. что есть богопротивное и всему отечеству вредное. ниже. и потому здравии. а ленивии прошаки Богу противни суть. и аще кто снабдевает оных, и той есть яко помощник, тако и участник оных же греха. и что либо на таковую суетную милостыню издержит, все то вотще ему не в пользу духовную. но из таковой дурной милостыни еще и отечеству, яко же рехом, великий вред деется. от сего бо в первых скудость и дорог бывает хлеб. [Регламент духовн. печат. Московск. лист 81 и 82].

Еще неправильная и неразумная милостыня есть подавати здравым да ленивым и за едину леность свою оскудевающим, трудитижеся не хотящим, но притворением бедности и немощи или лицемерною лестию подаяния ловящим таковии лестьцы суть тунеядцы, татие и заповеди Божии противнии, человеческому сожитию вреднии, часть прямым убогим должную похищающии. а подающии им милостыню прямых убогих обижают, лестьцов же в злодействии их утверждают и их же грехов участницы, суть подвизая на себе гнев Божий вместо воздаяния. [книжица толков. блаженств лист 42]

Веждьте же известно о правовернии [Розыск часть 3, лист 44], яко всяк приветствуяй раскольников врагов сущих церкве Христовы и дружбу с ними имея и подаяние им от имений своих творяй: враг есть самому Христу иже есть глава церкви своей. [Розыск, часть 3].

Древние, 20.

Иже власы плетуще [Кормчая, лист 25], и виюще или мудростию некоею шаряще на вред зрящим да отлучатся. Толкование. Растящии власы главы своея, и на долзе пущающе и плетуще, или виюще или шаряще и творяще белы или черны, или чермны. или русы, на вред простейшим таковых святый собор отлучити повеле. [Шестаго собора правило, 96. в толковании].

Матфей же в 9 главе, третияго стиха, возбраняет верным украшати себе, или власы брады стрищи или ушаряти власы, или плести власы главы своея. неповинующихжеся отлучити повелевает [Потребник старопечатный, лист 772]. се же приводит от правила 96, шестаго святаго собора, иже в Трулле. дозде.

Новые

Сами противно что оставя руское платье [Увещание Платона, лист 71]. ходят ныне в немецком, носят парики, и бреют бороды. но кто может сказать, что ношение платья, и стрижение волос надлежит до веры. благочестие к платью не пришито и внутренняя души добродетель на волосах не висит. вы не то примечайте. остригли кто бороду: но примечайте то, что он с волосами не отбросил ли и честныя душевныя нравы, не тем смущайтесь, что другой носит парик. но разсуждайте то, что он с париком не наделал ли вредных каких и странных мыслей. еже ли кто таков будет, и мы с ним сообщатися не станем. дозде.

Древние, 21.

Проклинаю богоненавидимую блюдолюбнаго образа прелесть душегубительныя помраченныя ереси. еже остригати браду, ей же бысть началник беззаконный Петр Гугнивый Римский папа, в царех же тоя ереси началник гноименитый Константин Ковалин иконоборец. ниже. окаяннии же латыни в ереси многия впадоша, к сим же и своего благообразия ненавидят и ругаются ему, и проказят лице подобия своего, иже Божиима рукама сотвореннаго. и таковаго богоделаннаго благолепия не даст им диавол ни видети, но всегда поощряет их остригати брады своя и усы притинати постригалы и бритвами. еще же злейшее творят яко и своими зубы укусывают власы брады своея и усы самоядцем подобящеся и проч. [Потребник Большой в чине приятия еретик, лист 600, на обор.].

Новые

Зде дадеся место к разсмотрению о брадах о них же мног в росианех наших ропот, имущих браду в великий закон Божий и в великое спасение [Розыск, часть 2, глава 19, лист 113 на обор.]. брадобритие же вменяющих в тяжкий и непрощаемый грех и в погибель вечную. но убо не лежит христианом о брадах закон [ниже лист 129], но произволение. и не от еретиков убо [ниже лист 130], но от своего древняго прежде крещения бывшаго обыкновения апостолами невозбраненнаго, христиане бриют брады, и не подобает сумнитися о спасении брадобрития ради [выше лист 129]. брадобритие бо несть грех против Бога [выше лист 128]. зде же и о усах мало нечто да воспомянется [лист 133 ?]. кто писал та словеса в того главе столко было ума сколько во власах чювства. аще священник имеяй косматы усы, от нерадения омочит я в божественной крови, согрешает да убо избегнути сицеваго греха возможеши о иерею. скрути я себе добре, или прежде служения пристризи. [дозде Розыск].

Древние, 22.

Аще кто предание церкве [книга Камень веры, лист 703, и в старопечат. Кирилов. лист 371, на обор.], или писанием или обычаем утверженное пренебрежит, да будет проклят. [вторый вселенский собор в действии 7-м, на конце].

Тем же всякому подобает всею силою держитися церковнаго предания от божественных апостол Духом Святым уставленнаго, и отоле множества преподобных и богоносных отец седмищи на вселенских соборех собравшихся утверженнаго и соблюдаемаго. прикладающих же что или отъемлющих или инако претворяющих, аще и сам будет крайнейший учитель кто, никако же слушати; но удалятися таковаго. или не явно есть преступление таковых еже святыми богоносными отцы писанная Духом Святым предание и чины, во времена подобныя положенныя развращати, своя же некая мняще быти паче Духа Святаго лучшая учения вносити. како не во отступницех Божиих вменятся таковии. [Старопечат. Кирил. лист 305].

Смеющих же прочее, инако мудрствовати или по мерзских еретик церьковная предания презирати, нова же некая разумевати или отложити. некое от чина церковнаго, евангелие или знамение креста, или восписание икон святых, или разумевати строптиво и коварно, еже развратити что от обычных преданий, вселенския церкве, аще епископ суть или клирицы изметати повелеваем и елицы тако не мудрствуют прокляти да будут и прочая [ниже лист 42]. [В неделю Православия евангелие толковое, лист 41].

Новые

Таковии творят с нами распри нынешнии в России раскольщики [книжица толкование блаженств, лист 84 обор.]: о сложении треперстном и двоперстном, о четвероконечном и осмиконечном кресте, о двойственной и тройственной аллилуии, о числе просфор, о брадобритии, о писме иконном, и прочих безчисленных яже вся суть вещи средния, словом Божиим неопределенныя, ко спасению весма ненужныя, свободе христианстей подлежащыя. должни убо суть искуснии учители, аще великаго сего миротворения участницы желают быти, искусно ясно и довольно показати народу, что помянутыя, и им подобныя вещи, весма суть средния, и прение о оных есть суетное: но и сие внушати им подобает, что аще кто вещь среднюю упрямством своим поставит в догмат, той уже сам еретик есть. понеже делает то составом веры, что Бог не зделал и свободе нашей оставил. и тако окаянный он совопросник, повелевая нам хранити, и за догмат держати, чего Бог не повелел. безмерною гордостию ставит себе не точию равна Богу, но и выше Бога [выше лист 83]. кая бо польза знать о вещех средних мало важных ведения недостойных, и ко спасению ненужных аще и истинны суть. ибо как не знать так и знать равне не нужно. [Книжица печат. Санкт-Петерб. Толкование блаженств евангельских, лист 84 и 85].

Заключение.

Да рекут убо иже с нами не мудруствующие чии суть сынове [послание Мелетия патр. Александрийскаго в Кирилове лист 434 на обор.]. отцев убо онех святых и боголюбезных не быти им чады, егда станем вси страшному престолу предстояще, коих познают своих отцы, отеческую ли веру и богодухновенная святых отец предания отвергших или нас православных, иже ничто же ни в чем изменших. не онех мню, но нас. и паки [послание того же Мелетия, 3, Кирилова лист 442 на обор. Апокалипсис глава 2, ст. 25, лист 13]: кое слово рцы ми; днесь отступити отец и новым сим внимающе. утро же и сих отпадати, леть суще и благо вельми отеческое правило держати, и апостольскую хранити заповедь, по реченному от Бога: держите еже имате дондеже приду. Сия словеса святый Андрей архиепископ Кесарийский сице разсуждает ельма убо к лукавым обретословцем противу стати, за простоту нравов не можете. аки глубины сатанинския не знавше. не ищу от вас брани словом: но хранения учения еже приясте, дондеже отсюду вас прииму. Блаженный же Златоуст, в болшее опасение привести нас хотя, о божественных словесех сице глаголет [Беседы апост. старопеч. лист 1774. и в Кирилов. старопеч. лист 378]: яко же в царских цатах [златицах] иже мало что от образа пресек всю цату непотребну содела. сице иже здравыя веры, и малейшую часть превратив все погубляет на горшая происходя от начала. и паки той же о превращающих помало благовествование Христово, глаголет [Беседы апост. к галатам гл. 1, в толк. на ст. 6, лист 1473]: иже бо прельщати их хотящии не внезапу сие творяху, но тихо прелагающе их от вещей. от имен не прелагаху. таковая бо диаволя прелесть не нагия предлагати лщения. аще бо убо рекли быша: отступити от Христа, яко лестьцов и губителей хранили бы ся. ныне же оставльше их в вере еще и прелести благовествования имя возложивше, со многим дерзновением прокоповаху здание. реченных яве, яко же некоими стенопрокопателей. понеже убо благовествование нарицаху свою прелесть [ниже, лист 1477], тем же и Павел не рече аще противная возвестят или превратят все, но аще и мало нечто благовествуют, паче еже благовестихом аще и худое что подвигнут. анафема да будут. [дозде Златоуст]. От чего разумеваем что всяк неотеризм [Кирилова старопечат. 3 послание Мелетиево лист 439 обор.] припряжен есть к беде. бегай убо беды. Ниже бо малая суть яже мала видятся, по Великому Василию, егда аще вред приносят великих. Но ниже мало ти да есть, еже смущати церковь, и всклокотати ея возноситися над богоносных отец, повеления божественная презирати. Бог бо есть заповедуяй: не преходи пределы вечныя, их же положиша отцы твои еже бо не веровати святых и знаменоносных мужей учению, и отметати тех предания. грех сей против самого Святаго и животворящаго Духа есть, дело и слово их утверждающаго последствующими знаменьми [Марка зач. 71]. ибо рече божественный апостол Павел: свидетельствующу им Богу знаменьми и чюдесы и различными силами. на сие место святый Златоуст толкование творит сими словесы [Беседы апост. ко евреом гл. 2, ст. 4, лист 2780]: не бо свидетельствовал бы им Бог аще притворили быша, свидетельствуют убо и они свидетельствует же и Бог. како свидетельствует. не словом ниже гласом. было бы убо и сие, верно но како знаменьми и чюдесы и различными силами добре положи. еже различными силами обилие дарований являя. убо не просто веровахом онем, но знаменьми и чюдесы. тем же не оным веровахом, но самому Богу. [дозде Златоуст]. И другий некто рече [Патерик Иеросалимский слово 12]: знаменоносцем же отцем не веруяй, или яже ими глаголемая, или деемая не приемляй, Христу паче и апостолом не верует, а не им. И ин [Иосиф Волоцк. зри старопечат. Требник иноческ., лист 308]: еже бо Христос кая собою? и не собою? но божественными апостолы, и святыми отцы предал есть. и тая яже убо отмещай и хуляй кто, всех неверных невернейший есть и ниже христианин может быти. [дозде святых свидетельства]. Тоже самое и нынешнии новии учители утверждают сице рекуще [книга Камень веры, часть 1. о икон. глава 6, лист 61]: кто предания апостол и отец святых, кто соборная правила и уставы церковныя отмещет. таковаго вера есть суетна, лжива, и душепагубная. кто тако без ума будет [тамо же лист 71], столпы непоколебимыя утверждатися восхощет, на трости ветром колеблемой, подобен тому будет и сей иже минув отец святых житием святым равноангельным просиявших, и боговещанная тех свидетельства презрев, веру имеет мерзским в сластолюбии погруженным Епикуром. [дозде именуемой Камень веры].

Конец. Богу слава.

Где еще за нуждное вознепщевахом напомянуть благочестивому читателю о звери том иже брань творит со святыми, о нем же пишет святый пророк Даниил, во главе 7, сице: Видех и се зверь четвертый. страшен и ужасен и крепок излиха. зубы же его железни велии. ядый, и истончевая останки же ногама своима попираше, той же различаяся излиха. паче всех зверей прежних. и разсмотрях в розех его. и се рог другий мал взыде посреде их. и аки очи человечи в розе том. и уста глаголющая велика. и рог той творяше рать со святыми. и укрепися на них. доньдеже прииде Ветхий деньми и суд даде святым Вышняго. [дозде Даниил].

Кто же есть сей зверь и рог, иже творяше рать со святыми. О сем различная мнения в книгах учителей церковных находятся; обаче все они гласят: не токмо на последняго сына погибели антихриста. но и на еретиков и отступников православныя веры, яко же следующыя доводы покажут.

Святый Мелетий патриарх Александрийский, в 4-м послании в Малороссию, к великому князю Острожскому, зверя Даниилом пророком виденнаго, гордому и величавому Римскому папе приписывает: зане, рече, велия некая глаголет о себе. и самому себе достоинство некое и власть устрояет, ими же Сына Божия начало и господьство низлагает. но сие велеричие зверю некоему свойственно быти. о нем же проувиде Даниил муж желаний. которому зверю уста бяху велия глаголющая, христианьскому же слышанию предивная и мерзская. [книга Кирилова 4 послание патр. Мелетия, лист 434].

Святии же отцы, 1755, писавшии свиток к Феофилу царю греческому, на еретиков иконоборцев, тамо обличающе злобу злочестивых царей Льва Исавра, и сына его Константина, сице глаголют [Соборник старопечат. лист 375 на обор.]: Горкаго же онаго горчайший отрод, Константин глаголю гноеименитый, царьства греческаго скипетры прием, изскочи от Васана, яко же пророк глаголет: востанет от корене его сад царства. на уготованное ему приходя. и творя славу царску. И паки, Иоанн Богослов глаголет: и видех и се рог един изыде аки агнечь. и глагола к змию иже творя рать со святыми [ниже лист той же]. рече бо в сердцы своем окаянный. яко же и диявол. се на небо взыду, и над звездами поставлю престол мой, и крепостию моею сотворю. и мудростию моею отвергу уставы от отец преданныя и церковную крепость попленю. ниже той зверь рать сотворив со святыми [лист 386 ...?], яко же пророк глаголет, словеса хулная глаголя на Вышняго и прочая. [дозде от Свитка святых отец].

Преподобный же инок Зиновий Отни пустыни, ученик премудраго Максима грека, в слове обличительном на Лютора и Калвина, обще всем еретиком приписует зверя онаго свойства. их же устами глаголаше той на Бога и на святых Его хулная словеса: А в еретиках, рече, дух лживый сатанин живет [Соборник малый старопечат. ..? Иосиф лист 122]? со злейшими духи лукавыми по обещанию Господню на таковых тем же и хулная словеса вещают. сии к вышнему. яко же о них пророк глаголет: зверь восходя от бездны. и рать творя со святыми. [дозде Зиновий].

От сих словес яве познаваем яко дух антихристов действуяй в еретиках отверзе уста в хулу на Бога, похулити имя Его, и скинию Его, и на небеси живущыя, яко же есть писано во Апокалипсисе. ибо рече святый Ефрем [Слово 105. о антихристе, лист 299]: яко всяцем коварством кует антихрист. да отнюд имя Господа Спасителя пресвятое и славное, не именуется во времена змиева, бояжеся и трепеща святыя силы имене Спасова се творит немощныи.

И другий некто под видом вопрошения глаголет: что есть свойственно антихристу рече [на 1-е соборн. послан. Иоанна в предислов.]. Таже сказует быти сие, еже глаголати не быти и самого Христа. О времени же антихристовом списатель книги О вере пишет тако [глава 30, лист 270]: О правде, яко много предотечев но и сам уже близ есть по числу еже о нем: 666. число бо человеческо есть антихристово. кто весть аще в сих летех 1666-х явственных предотечев его. или того самого не укажет. и аще кто достигнет тех времен [тысящи шести сот шести десяти шести] тогда готовым быти подобает, рече, на брань с самым диаволом. [дозде из книги О вере].

Прочее оставляем на разсуждение разумным людям по увещанию святаго апостола Павла, глаголющаго к филипписеом: елицы убо совершени, рече сие да мудрствуем. и еже аще ино что, мыслите, и сие Бог вам открыет. обаче в не же достигохом, то же мудрствовати, аминь.

Прибавка или прилог полезный.

Из Гранографа древняго Сивиллино пророчество О судном дни [глава 51]: Егда приидет кончина свету, будут в людех великия страсти которыя прежде не бывали. во всяких родствах в людех покажется злость [злоба]. правда и вера и милость, и всякия добрая дела от человек отлучатся, и добрыя от злых в тесноте будут, и милости над теми сиротами не будет. лакомство в людех вселится, мужество в женьство будет, войны и междуусобия, востанут отец с сыном, а сын со отцем зло начнут творити, мудрых и честных людей не станут слушати и всяк свою веру вознесет, мудрым людем посмеются, безумных же чтити начнут, младыя старым противны будут, солнце и месяц часто затмятся, разбой и всякое воровство силу возмет.

Осядут свет десять мужей сильных, и востанет из них един, злой сердитой Асию, и Африку осядет и иныя земли под себе возмет и разделит веры и свои законы уставит, государьство свое пременит, с одной страны на другую сдвинет, и посем горчае того будет своих людей теснити и бити начнет, и не будет сна и покою, во дни и в нощи и страх будет во всем свете, и глас плачевный к Богу от всех людей будет от великия нужды и беды и печали.

И потом лживый пророк востанет святых и праведных Богу служащих людей всех побиет и жития его будет на земли четыредесять два месяца, и повелит себе хвалити яко Бога. и называти себе начнет Христом. и знамения станет творити многа. и людей приведет к себе и мету на них станет класти на теле. а которыя к нему не уклонятся, убивати станет такова будет нужа что побежат люди в горы и в пустыни. он же злый и тамо их найдет и они возопиют ко Господу великим гласом о еже избавитися им от таковых скорбей. и Господь Бог услышит молитву их и послет к ним ангела своего, который умирит всю землю и соймет тягость со всех людей и сердца их охладит. и прочая. [дозде от Сивиллина пророчества].