Сочинения Ивана Алексеева († 1776) Сочинения о бегствующем священстве Части 3,4.

Господину честному, и воину изряднейшу, и в мысли остроумнейшу, взыскателю горних усерднейшу, убожество наше кланяется и сими словесы приветствует и поздравляет.

От перваго убо разговора с тобою (о власти духовной) познах тя быти разумна и добрых нравов взыскательна; ныне же и от сродныя ти понуждаем есмь о том же и паки писанием возобновити. Но яко вежества словесна [мудрости словесы] не навыкшим нам лепотствовало бы пред вашим остроумием молчати; но обаче обрести нам благодать пред вашим почтенством, простою мыслию приведохомся на сия, во еже сими словесы истинну показати правду церковную, ея же отпадением тще спасение наше имать быти. Тем же для удобопонятнейшаго разума об искомой вещи, на подобенство вашего чина во основание из евангельских сокровищ нечто изъяв, придаю днесь благоумию твоему в руководство, о чем у Матфея в Благовестии в зачале 25 обретается: Вшедшу Исусу (рече) в Капернаум, приступи к Нему сотник, моля Его и глаголя: Господи, отрок мой лежит в дому разслаблен, люте стражда. И глагола ему Исус: Аз пришед исцелю его. И отвещав сотник, рече Ему: Господи, несмь достоин, да под кров мой внидеши, но токмо рцы слово, и исцелеет отрок мой. Ибо аз человек есмь под властию, имый под собою воины, и глаголю единому: иди, и идет, и другому: прииди, и приидет, и рабу моему: сотвори се, и сотворит. Слышав же Исус, удивися, и рече грядущим по Нем: аминь глаголю вам, ни во Израили толики веры обретох; сотнику же рече: иди, и якоже веровал еси, буди тебе. И исцеле отрок его в той час. Дозде Евангелист, от его же повести искомыя вещи явственное указание сотворим.

Бывшу бо Исусу на горе и народом заповеди тамо предложившу многи, сниде с горы, и последова Ему народ. И егда Ему приити во обитательный свой град, сретает Его сотник, и яко же лепо самого Господа и Бога молит Его, да исцелит отрока его. Исус же, предведый вся смотрительно, рече ему: Аз пришед исцелю его. Но сие убо сотник отрече, глаголя: яко несмь достоин, да под кров мой внидеши. Ведяше бо сотник Исуса иудейска рода быти, себе же языческа, и яко иудеом не бяше повеления ко язычникам входити: того ради и отрече вход к себе Исусов. Какое зде разнство! Хананея бо иногда ко Исусу вопияше: помилуй мя, Господи, Сыне Давыдов, дщи моя зле беснуется. (Исус же) ничто ей не отвещеваше, и учеником, о ней просящим Его, рече: несмь послан, токмо ко овцам погибшим дому Израилева. Сей же сотник и не проси, Исус же сам позвася абие к нему в дом на исцеление приити. Вся бо сия предведущия премудрости Божия исполнено: разуме (бо) Исус внутреннее движение сотника, яко от словес сих Христовых произыти имут от сотника словеса, веры предивныя исполнена, обличающия в неверовании словесем Его (весь) народ. Тем же и по внегда рещи Исусу: Аз пришед исцелю его, сотник, из своея военачальныя власти божественную Его власть и без присутствя Его самого действительну быти разумев, глагола: рцы точию слово, и исцелеет отрок мой. Утверждает же сие доводом сим: ибо аз, человек, власть некую над воины под собою сущия имам и повелеваю им: иди, и идет, и прииди, и приидет, и сотвори се, и сотворит. Такову пречудную веру сотник из своего чина ко Исусу Господу нашему разуме глаголати, от единыя того премудрости, учения и чудотворения навык: аще бо ты Бог и Владыка над всеми всесильный, то может и без присутствия Твоего быти, еже хощеши, – рцы точию слово и исцелеет отрок мой, ибо и аз, по данной мне власти от Кесаря, и не присущ где, слово мое действует. И воистинну, власти естество таково, идеже и несть власть имущий, слово его чины устрояет, на степени высокия возводит, почестей сподобляет, и из сего обнажает и извергает, вяжет, биет, в темницы затворяет и смерти предает. А ему же несть власти, и пришед ничто может сотворити. Таково любомудрие о Исусе сотник показа, ни в закон вник, ни в пророки, но от своего чина Божию власть и силу истинную быти изрече, и тако всех, закон слышащих и чтущих, не могущих (же) власти духовныя и силы познати, обличи, и Христовы похвалы сподобися. Что же рекут Господеви слияние власти божественныя творящии, закон чтуще, а от закона о власти сей, Духом Святым в церкви положеной, научитися не могут доселе? Научися убо ты зде премудрости Владычни, како из обычных ведомостей человек человека удовляет и в свое любомудрие приводит. Тако звездочетцев звездою на поклонение к себе приведе; тако рыбарей ловитвою рыб последовати себе устрои; тако и сего сотника от власти его сущия Божию власть разумети сотвори. Тако и мы, худейшии, от разума Божия навыкше, о честнейший, хощем ти из всеначальныя вам власти церковную и сущую в ней Божию власть указати и яве истолковати. Виждь убо, како и вы под властию прочих вышших пребываете; аще бо владяй вами и той же человек, яко и ты, но властию данною ему паче тебе: тем же и не силен ты во оном, но он в тебе, и очи твои нань взирают, и уши твои к нему отверсты, и сердце, и ум, и всего тела твоего движение на повеление его готово, и не имаши ты в его власти, но разве повелит ти он сотворити что во владомых им, силен бываеши (тогда) содеяти то и ты. Аще же и тя испытати подобает, имаши и ты власть, но токмо над челядию твоею и над домом; а на гражданстве твоя власть не бывает, но того есть токмо, ему же от превышшаго владыки власть сия дана бысть. Откуду научаемся разумети, всякую власть быти ино и всяк человек ино, не бо единоестественни суть человек и власть, трава и цвет травы. Ино убо есть естество, наводящее траве доброту. Их же рознство и пророк представляя, глаголет: всяка плоть яко трава, рече, и всяка слава человеча аки цвет травный: изше трава, и цвет ея отпаде. Различия степени церковныя власти научитися (возможно) от планет небесных, о них же Апостол глаголет: ина, рече, слава солнцу, и ина слава луне, и ина слава звездам: звезда бо звезде изобилует во славе. И луна убо не может свет солнца показати, такожде и звезда своея меры превзыти. Сице бо есть положение небесе аернаго, из него же приуказы [указания] и доводы имамы о церковном небеси. Суть бо и в нем во образе солнца чин архиерейский, или рещи апостольский, наместников Христовых, к ним же сам Христос рече: вы есте свет миру. Сего ради в служении Божественныя литургии Христа дело собою являют, двома свещема по входе крестит [осеняет], знаменает от Христа в дву естествах исходящую светлость, коею светлостию небесная и земная просветил есть; потом же на горнем месте святитель седши, крестит треми свещами, знаменует, яко во еже сести Христу одесную Отца, просветишася людие в разуме знати Святую Троицу. И сицевых дел иерей своим действом показати не может; аще что и знаменует Христово, обаче не с такою властию, но смирения вид показуя, иначе и иначе во всех священных действиях, а не со властию. Обаче и се не без архиерейския силы; ибо он, по образу луны, влечет себе свет от солнца, архиерея. Но ино есть свет солнца, и ино свет луны: луна не светит, аще лучю солнца не приимет; иерей не может что освятити, аще света благодати от архиерея не приимет. Первый бо свет солнца, Христа, полагается во архиереи, и от него, как от зеркала, или от воды луч к стене отпрядающь, в прочих предается, по священному Дионисию. Тем же без архиерея, просветителя суща всех, ни диакон, ни иерей в благодати может быти, по Симеону Фессалонитскому, о чем указует сице: "единый действует епископ, свидетель свещателен сый, яко подражает Бога, Отца светов, и Его же обилует благодатию, си есть дарований даром, и всяк чин, и вся тайны и все совершенство чрез него" (гл. 75). Той же: "яко же бо от источника света, вся церковная чрез него совершается, тем же свещателен именуется епископ" (гл. 76). И паки той же: "Яко от епископа токмо мvро и хиротония, и чрез него во всех действиях епископская предваряют благодатию". Слыши, ничтоже действовати священник может в дусе, или иное что действовати, аще хиротонию не имеет: сия же от архиерея есть, ибо архиерейство чрез ню действует. Паки: "иерей не действует тайны без жертвенника; сей же чрез мvро освящается, мvро же чрез архиерея токмо совершается. Убо кроме архиерея ниже жертва, ниже священник, ниже жертвенник; весма убо вся сия чрез архиерея суть" (гл. 77). Дозде Симеон. В предисловии же Номоканона пишется: "мирских человек простых грехи в менших да со искуснейшими (поп разсуждает); иереев же и протодиаконов грехи, яже извержения томления наводят, епископов суду подлежат. Да не дерзнет духовник разрешити их: якоже бо невозможно ему хиротонисати, сице ни на степень священства изпадшаго возвращати". До зде Номоканон.

Видел ли еси сими доводами величество чина архиерейскаго? внял ли еси силу тех превосходящую, нежели рещи в солнце светлейший свет, действуяй в прочих светилах в раздании светов, луну и звезды просвещающи? Аще бо и спрятается [скрывается] от наших очей солнце, но от лица луны не спрятается; аще ли на колико спрятается от луны солнце, луна отемнится. Разумей убо глаголемая, каково убо Творец наставление тебе из сего дает, в нем же да научишися познавати от Вышняго всему в церкви просвещению быти: не убо луна солнце просвещает, но солнце луну просвещает, и не может нам света подати луна, аще от солнца не просветится, по устроению Зиждителя. И сия убо планит сих власти и силы прикладны ти будут [примером ти да будут] во свет и благочиние церковных чинов. Аще бо архиерей имать свет Христов, просвещает всех, и вся благодати Божией исполняются. Иначе быти не мощно. Не может бо диакон приносити (жертвы), ни иерей хиротонии совершити.

Из сих убо двух, – из мирския, глаголю, власти и из небесных светил, – дахом ти сию третию власть и силу церкве святыя чинов вызнавати. Не мни убо власть церковну хуждши планетныя и мирския власти, но паче и паче да лепотствует ти церковная. Яко же духовная мирских и одушевленная воздушных превосходит честию, тако оных церковная. Видиши ли луну когда в небе сияющу, и абие погубляющу свой свет, не ино что виновное (сему) разумей быти, токмо потеряние [сокрытие] света солнечнаго, кое в полномесячии обыче бывати, от средостения земли, путь лучи солнечныя пресечением: от сего затмения лунна бывают. Разумей сия: дондеже свет архиерея сияет в нем, светоприемен бывает иерей и просвещает народы; аще (же) заградится чим дарование архиерейско на иерея приити, (сам) по себе иерей не может свет возъимети и других осветити, но во тме пребудет, о чем доводы выше предложихом.

И такими словесы, евангельскими и учительскими, церковными и гражданскими, и светилы небесными, о власти и силе степеней церковных нашу истину уяснивше и богопреданную тую быти показавше, кто дерз[остен] сице духоположенныя степени сливати и епископския должности, не по данней им власти, себе придевати [присвояти] сим действом, во еже даяти новоприходящим иереем власти священная деяти? Востанет убо на суд сотник сей, и осудит род сей продерзый, яко [он бо] единым естественным своим разумом власть Божию подобательно позна, нежели сии, на законе почивающии, церковныя, глаголю, и Божия в ней власти разлучити едины от другия не могут, и архиерейскую со иерейскою властию во едино сливают, не ину власть архиерея, и ину иерея, но архиерея и иерея едину быти глаголют. О, слепоты! о, презорства великаго! Кто бы от разум имущих рек, (яко) солнца и луны единак свет, или кто (бы) рек тысящника, и сотника, и сержанта, и капрала едина власть и сила? Никто же бо собою власть и силу приемлет, но от высшаго, и во что прия, в том и может [творити]; не приим же власти аще кто и во гражданстве, ничто может быти повеление его; аще же не по данному во что вступит, указы, или грамоты раздаяти будет, раны за то приимет. Рцы слово токмо и исцелеет отрок мой: ибо и аз, рече сотник, имам под собою воины, и глаголю единому: иди, и идет, прииди, и приидет, сотвори се, и сотворит; но сия по данной власти бывает. Слыши бо Христа глаголюща: дадеся Ми всяка власть на небеси и на земли. Зриши ли? – дадеся, глаголет. И такову убо власть, отходя Христос на небеса, даде Апостолам и тех наместником, архиереем, в сицевых превысочайших словесех и таинствах, рек: якоже посла Мя Отец, и Аз посылаю вы. И се рек, дуну, и глагола им: приимите Дух Свят, и имже отпустите грехи, отпустятся им, и имже держите, держатся. Видиши ли величество вещи? зриши ли, каково власти подаяние? И сея убо первейшии приемницы Апостоли и архиереи; и сии суть во власти и силе полномощнии. Рцы, рече, слово, и исцелеет отрок мой. Тако бо Христос не все присутствием своим, но (и) словом могий деяти. Сего, поелику возможно, и Апостоли быша наручницы [наследницы], словом на небеси и на земли вязаху, словом [от болезней] исцелеваху. И сей апостольстей силе словом вязати и решити быша и епископи наручницы совершеннии, а не иереи; иереи же токмо слуги в повеленных архиереом, аще повелит им кия грехи вязати и решити, а не совершенной силе, о чем читати Номоконон и книгу Симеона Солунскаго. Зане глава и жених церковный епископ, а не иерей; и той благодать Всесвятаго Духа во многих дарех восприят. Глаголется (бо) источник, во еже всех напаяти в потребах, того ради таково знамение источников и на ризе носит. Той глаголется совершен пастырь, в кий образ и жезл пастырский предносящь имать, тако бо от Духа Святаго дадеся ему: приимите, рече, Дух Свят; и инде: даю вам власть, и проч. Не приемше бо от Духа Святаго сынове Скевы, о них же в Деяниих апостольстих (пишется): и зряще Апостолов, запрещающих бесовы словом, тожде и они запрещение творити начаша; но бесове, видевше их не приемших таковыя от Христа власти, нападше на них, бияху, и едва смерти не предаша, глаголаще: мы Христа знаем и Павла свемы; вы же кто есте (гл. 19, ст. 14). Видиши ли, – слово бысть Апостол, и слово бысть сынов Скевы; но апостольскаго ради слова трепетаху бесы, а сынове Скевы за слово трепетаху бесов. Что же есть вина сего разнства? Не обретаем, точию сия: зане Апостоли, имуще Христову власть, запрещаху, а сынове Скевы не прияша такия власти. Темже и ныны всяк дерзаяй и запрещаяй не в данных ему, ничтоже есть, но и паче посрамляется и ранам достоин бывает.

Краткими словесы пробег аз о власти и силе разных степеней, во еже разумевати архиерейскую [власть] над вся, и не обществовати [совокупляти] того совершенства с нижайшими, да не противницы Духа Святаго во он день обрящемся, любви вашей доброжелательствуя и послушанию рабствуя, поклонением окончеваю.

IV.

Книга:

О бегствующем иерействе разговоры и извещение о должности святейшаго предания.

Сама собою Премудрость Божия и Законоположитель Христос Бог претит, глаголя: аще кто церковь преслушает, да будет ти яко язычник и мытарь, о чем учит Апостол. Подобне же нечто и в премудром Соломоне запрещает, глаголя: не преходи предел вечных, яже положиша отцы твои. Все божественное писание, ветхое и новое, свидетельствует спасению нашему быти от хранения закона и преданий по вере правой. Аще же ли кто инако учит, отступай от таковых, по Апостолу. Закон же в нас сугуб положен есть, или самого Христа Бога нашего повелением, или святыми Его ученики и Апостолы преданием, и тех наместниками, святыми архиереи, уставлении и изъяснении: тожде и едино заповедию Христовою умствовати подобает, по оному: слушаяй вас, Мене слушает. Сего ради Павел глаголет: аз приях от Господа, еже и предах вам. Но аще мы, или ангел с небесе благовестит вам паче, еже благовестихом, анафема (Евр. бес. 34). Церковь святая Иоанну показана бысть облечена в солнце Христова приказания, и луна под ногама во утверждение ветхаго завета, и окрест ея главы 12 звезд, апостольскаго учения знаменованием. Тем же последнее святых соборов о сем сицево запечатление полагается: "вся яже чрез церковная предания и учительства и воображения святых и приснопамятных отец новосотворенная и соделанная, или посем содеятися хотящая, анафема". Заградитеся ныне уста в чревоугодие отверзающаяся, умолкните языки ради плотскаго угодия отвергающая богопреданныя церковныя догматы и в пространные входы тесныя врата превращающая сими словесы: се ничто, и се невелико, а се не нынешняго времени заповедь, киими словесы, аки облаки темными, хотяще свет истиннаго предания закрыти. От времен апостольских неслыханная ныне заповедь явися, изменяющая церковная предания, в них же Христово законоположение на некия басни [превращающе и] глаголюще: отцы наши так творили, и мы, последующе им, тожде творим. А от предания святыя Церкве не показуют, токмо вместо предания мощи нетленныя отец своих представляют, а того не разумеют, яко чудеса втораго есть чина, по Лукину благовестию: Господу поспешествующу, (рече) и слово утверждающу последствующими знаменьми и чудесы. Зрите ли, чудеса точию во утверждение слова потребна, да познано будет слово то истинно быти; аще же слово не будет истинно, знамения по себе крепости не имут. Тем же явите нам истину церкве предания, его же дело ваше видим далече отстоящее. Но Христос повеле веровати по писанию; Христос слушать Апостолов повеле, яко себе; Христос повеле слушати церковь. Настоящее же ваше учительство вне Христова учения, вне апостольскаго и соборнаго предания, о чем разговорами сими явим. Аще ссылаетеся на отец своих; но отцы ваши великия ревности в богопреданных бяху, о чем [выше] историю предъявихом. Аще же и Феодосия речете, то и он иначе поступаше во оном; в хиротонии же новотворной аще и попусти, но не сообразной вам и от времене действующих и от приемлющих действо. Но яко о сем удоволивше слышателя вышепредложенною историею, кая вас изгоняет от упования ваших иереев, понеже несте оных (последователи): убо и не нарицайте их "отцы наши, древнии иереи". Изгнани бо есте наследия их своими делы. Прочее грядем к канонам и историям святыя церкве, и будем уже ими вас разсмотрять, аще первенствующия церкве Христовы хранителе преданий и обычаев есте. И сице известное предложив поступаю в разговоры.