Сочинения Ивана Алексеева († 1776) Разговоры о разнствии между приемлющими настоящих иереев и не приемлющими. Разговоры 4, 5.

От жития святаго Тарасия.

Разговор 4-й.

Пришедый: Признаваю ныне нечто от предложенных подобательное; обаче еще имам некая словеса, подтверждающая мя, о Тарасии святом патриархе Цареградском, яко он иконоборцами на сие рукоположен бяше и в том рукоположении до смерти своея действова святыя тайны церковныя.

Аз же: Несть нашего умствования в том, еже глаголеши.

Пришедый: Чего ради?

Аз же: Вины ради сей, яко не могу о себе творити ничтоже, Христос провеща; мы же кто? своя глаголати хощем!

Пришедый: История о Тарасии тако от обстоятельных вещей и дел того времене наставляет умствовати, яко святый Тарасий от иконоборец рукоположен бысть, понеже в та времена по всем странам епископи благочестивии искоренени быша: Копроним бо царь всюду посла грамоты позывательныя епископов в Константинополь на собор, и бе сшедшихся тамо 338 епископов, и всех тех принуди царь тогда на иконоборство руки подписати. Тем и несть мощно кроме иконоборец Тарасию поставление восприяти.

Аз же: Двое зде разумети подобает: первое, яко не по воли, но по страху подписаша то, о чем и каяхуся последи, и на седьмом вселенском соборе разрешени; второе, яко много еще епископ и непорочных в сем осташася.

Пришедый: И откуду се мне покажеши?

Аз же: От разных историй. Но яко не сему глаголанию есть время, на ино место отложим; речем зде едино сие, яко Иоанн святый епископ Готфский и во дни Копронимовы часто к самой царице Ирине на увещание прихождаше, непорочен сый.

Пришедый: Аще и бяше сего к ней вход, но временем; внутрь же Царяграда и окрест епископи иконоборцы быша.

Аз же: Тарасий святый благоверен бяше зело и власть имяше в том от самыя царицы и прочих, яко же повествует Метафраст и Бароний: "Егда бо, рече, по словесем Павла исповедника, царица Ирина собра в палате Мегиавру весь народ мирскаго чина и духовнаго на совет, избрати патриарха вместо Павла, и егда общим гласом присудиша никому иному се достоинство прияти, токмо Тарасию, тогда Тарасий блаженный, став посреде их, рече: яко восточнии и западнии нас проклинают по вся дни, аз же проклят не хощу быти, но аще изволите для соединения церквей собор собрати, то аще и недостоин есмь, обаче на се сложуся. И вси, во еже быти собору, соизволиша". Дозде повесть, от нея же вопрошу тя: иконоборцев ли на сем совете со Ириною мниши быти?

Пришедый: Иконоборцев.

Аз же: И чего ради мирно на честь иконную присудиша?

Пришедый: Мню, яко царския власти убоявшеся.

Аз же: Аще зде царския власти убоялися, како же на оный вселенский собор и с мечи приити не убоялися (и с) воины, глаголюще: аще попустите (рече) идолом вносимым быть (сице иконы нарицаху), помост сей крови епископов исполнится? И сие схождение их несогласно первому почто?

Пришедый: Виновное сему, яко не сих мню на том совете быти.

Аз же: И аще не сих, убо остает разумевати благочестивых быти.

Пришедый: Негли посредственно тех во иконоборстве разумевати, негли человекоугодне и прикровенно на то царице присуждати, а последи сию злобу чрез воины сия износити.

Аз же: Не малаго удивления вси твои глаголы! Рекл бо еси я и посредственне и лукавно глаголющих царскому лицу, аки бы иных не мощи. Обаче Бароний не по тебе о Ирине царице, таковаго же совета ищущей, глаголет с благоговейными о искоренении иконоборства начати совет, а не со злыми. Еда бо, рече Христос, собирают от терния грозди и от волчец смокви, тако и от злых благаго навыкнути.

Пришедый: Можеши ли доказати то, яко Ирине царице было откуду благоговейных и кроме иконоборцев на совет собрати.

Аз же: Довольная ти свидетельства имам о сем представити, яко аще и многия страны со епископы ко иконоборству приобщены быша, обаче многих читаем и благочестивых мужей, от мирскаго и духовнаго чина и инок, во оная времена по многим странам быти, и в самом Цареграде ересию иконоборною неповрежденных, их же сице объявляю. В житии святаго Тарасия пишет, яко по отшествии Павлове, в покаянии мнози христиане начаша быти в самом Цареграде небоязненно. Виждь убо: и в самом Цареграде многих глаголет быти. В том же граде во оное время бяше секретарь царских дел, в мирском чине, святый Тарасий. В то же время царския палаты бяше советник святый Никифор, сдруженный святому Тарасию, кой последи и наместник Тарасиева патриаршества случися. В то же время супруга святаго Феодора Евдокия бяше, Никифора святаго мати, в дивном житии даже до лет патриаршества сыновня поживе. Чти Июня 2-го. В то время бяше святый Феофилакт исповедник, присвоенный святому Тарасию. Чти Марта 8. В то время бяше преподобная Анфиса, дщи царя Копронима, тетка сея Ирины по мужи. Чти Апреля 12. В то время бяше святый Козма халкидонский, рожденный в Цареграде. Апреля 18. В то время бяху блаженный Фотин и Феоктистия, родители святаго Феодора Студита. Чти в житии Феодора, Ноября 11. В то же время бяше преподобный Феодор Студит. Чти Ноября 11. В то время бяше брат Феодора сего святый Иосиф, епископ Фессалонитский. Зри Пролог Января 27. В то время бяше Михаил епископ Синадский. Чти Маия 23. В то время бяше Платон освященный, иже и на седьмом вселенском соборе присутствова. Чти Апреля 5. В то время бяше Симеон прозорливый. Чти в житии святаго Георгия исповедника, Апреля 7. В то время бяше Георгий брат Симеона прозорливаго. Чти Апреля того же дня. В то время бяше в Сигрианских горах монастырь, именуем Малое село, преподобными отцы окормляем. В тех же горах бяше монастырь в Полихронии, правим Георгием прозорливым. В тех же горах бяше монастырь во острове Коломонис. В то время бяше благочестивая епископия в Катанех, Львом епископом правящася. Чти Февраля 20. В то время в Сурентии епископами благочестивыми людие правяхуся. В то время такожде в Захарии людие благочестивыми епископами правящеся. В то время в Сугдании благочестивии епископи бяху. В то время за Еллеспонтскою пучиною, во острове Лимнос, благочестиви епископи бяху [На поле: Митрополия Царю граду прилежит. 6-го вселенскаго соб. пр. 39]. В то время в Милитине благочестиви митрополити быша. В то время в самом житии Тарасия описуется, яко многая увещания Павел бывый патриарх Царяграда на исправление иконоборныя ереси, на избрание Тарасиево Ирине подаде, между коими словесы и то сказа, что многия под рукою державы царствия их земли, правило веры неизменно держаще, удаляются иконоборных церкве. Чти в Тарасиеве житии. В то время бяше преподобный Иоанн епископ Готфский, к самой царице поучительными словесы о благочестии святых икон, часто входя, увещеваючи. Чти Июня 26. Пишет убо Бароний в лете Господнем 780-м, яко "умершу царю Льву, злому на иконы святыя гонителю, наста сын его Константин десятолетен с материю Ириною, и в сие время державы приятия царства их всякому невозбранно было Господу Богу служити и православное учение проповедати, глаголати же с еретики и препиратися о чести икон, о чем при Льве и уст отверзти было не мощно. Откуду и признатися возможно есть, яко и в самой царице не малая бяше о благочестии склонность, негли се наипаче по предъувещанию онаго Иоанна Готфскаго в ней явися, яко же читаем Июля 26, негли же и Павлово, в 5 лето державы тоя бывшее, увещание поможе ей ко истинному взысканию благочестия. Откуду и мысляше Ирина со иными своими, кого бы сыскати на умирение бедств оных и на устроение собора вселенскаго онаго; но никого же обретоша, токмо сего Тарасия, секретария кесарьскаго, но мирскаго, котораго егда на сие преклоняху, отнюд соизволити не хотяше. И тогда нужда бысть ей весь народ духовнаго чина и мирскаго собрати в палату Мегиавру. И егда же собратися им, рече: весте что сотвори Павел? поищем церкве добраго учителя! И возопиша вси: никтоже ин может быти, токмо Тарасий. Тарасий же изыде к ним, и сице глаголаше о себе: Вижду раздрану Церковь Божию, а восточнии и западнии на всяк день проклинают нас! Тяжка вещь есть клятва и отлучение от царства Божия! Едино крещение, едина вера, едина церковь православная; ничтоже тако Господу Богу приятно, яко же сие, егда вси едино есмы. Аще собор вселенский устроен будет, да вси соединени пребываем, аз соизволяю; аще же сие не будет, аз проклят и на суде Божием, от него же мя ни един кесарь свободити может, осужден быти не хощу. То слышавше вси, на собор соизволиша. По сем Тарасий на патриаршество посвящен бе, егда уже от всех чинов имяше обещание". Дозде Бароний. От сих всех предложенных яве есть, яко на оном тогда со Ириною совете не быти иконоборцем; ибо возможно есть от таковых обстоящих людей и от таковых обстоящих ю благочестивых епархий и монастырей и кроме еретиков на таковый и толикий духовный совет собрати. Внимай убо сему опасно. Яко же царице от разных подъущений изъят бысть недуг иконоборства, и наведеся доброе исповедание святых икон в почитании и славе, а наипаче страх оных громогласных словес Павловых объя сердце тоя, да не отпадет в такой противности царствия Божия: тем же и труд взыскания и совета от своих ей требоваше, да на искоренение тоя ереси старателя обрящет. И к сему годствовало ли бы оных ересиархов, на самих себе главу, призвати? Котораго бо такова есть совесть – на свою злобу иным советовати? Можеши ли ты на ся и на дом твой зол совет подати? Никако же. Тако и о том совете разумей быти, – сокровенне, и тайне, и единомысленных собранием, аще история за краткость и умолчевает. Возми же о сем себе в разум: аще бы тамо ересиархов оных, глаголю епископов иконоборных, собравши, рекла бы тако: кого нам избрать во истребление ереси иконоборныя добропочтительна? и вси бы, минувше председящих оных епископов еретических, на мирскаго сего человека, глаголю Тарасия, показали бы, яко никто так может сотворити, точию сей, – не двояка ли в них злоба отсюду возрасла бы? Первая, яко онии епископи, во иконоборстве обыкшии, слышанием на их ересь хульных оскорблений обезчещени были бы. Вторая, яко и велия презорства и несносныя срамоты знак, во еже минувше тыя, мирскаго на их пагубу избрати. Самыя зависти вещь сия и мятежа вина; не малыя бо ревности и рвения яростное тогда возгорелося бы во оных, и тако бы тамо прибытием их не совет благ, но вражда бы была излишняя. Тем же царица Ирина, яко изряднейшая в разуме, в державе царствия щедрая, собра единомысленных себе, и тако вещь добрый конец прия.

Пришедый: Но аще сему и мощно верить, яко не быти на том совете иконоборцем по силе царскаго изводения, но благоверным, могущим на благое дело добре присудити; обаче поставлению Тарасиеву не мощно в церкви кроме иконоборцев сотворитися.

Аз же: Чудны суть словеса твоя! Яко их же глаголеши, а сам ты в словесех твоих чувства не имаши. Рекл бо еси прежде, яко буди тако, что и не быти на том с царицею совете иконоборных епископов, но точию благочестивых, о них же довольно приведеся прежде; ныне же прислагательное глагол твоих аки забыв, или не вняв, паки глаголеши таже, яко не мощно Тарасию откуду рукоположение на ся прияти, токмо от иконоборцев за обстояние церковное тех. Но для искоренения обыкновения твоего, пресекши докончание слова истины, вопрошу тя: исповедуеши ли ты на оном царицы совете епископов благочестивых быти, или ни?

Пришедый: Откуду аз исповедание дам сие, яко тамо благочестивии епископи быша?

Аз же: От оных словес, яко духовнии вси чины тамо быша; духовных же разумеем паче освященный чин быти. И аще освященный, то ведати подлежит зде четцы, диакони, иереи и епископи, к сим же и иноки, понеже тамо сказует всякаго духовнаго чина быти.

Пришедый: Буди тако; но аще и мнится таковым православным священным чинам быти тамо, однакоже како сие может быти, оставя своих ему, ту сущих, епископ, от странных рукоположитися? – вещь мятежа полна.

Аз же: Познаваеши ли словес твоих плетения, яко путы некия ти быти? Ибо прежде, во отревании на совет оных, яко мятежу виновно, сопротивился еси; ныне же самого тя принуди рещи за презорство рукоположения быти мятежу, яко естество самое научает знати. Но яко везде требовати ми снисход словесем твоим, тем же для лучшия пользы вопрошу тя: что же, – аще попустим Тарасию от иконоборцев рукоположену быти, подобательно ли есть глаголати, яко и священнодействовал с рукоположившими его еретики до собора.

Пришедый: Никако; но мню, яко токмо рукоположитися от иконоборцев во архиереи восприя; действовати же, аки православну, с еретики неподобательно ему бысть.

Аз же: Странное глаголание твое, странное слышание! И далече суть закона словеса твоя. Ибо рукоположение от еретик приимати не противно быти глаголеши; а служением с таковыми приобщатися, се противно ти вознепщевася. Смеха бо и срама суть достойна сия словеса твоя. Лучше бы тебе общество священнодействия такова в противное не вменяти, нежели священство правоверну от еретик прияти, аще и обоя далече суть церковных законов, и вне творяй отмещется священства (Соб. Карфаген. пр. 9 и 124). Но оставим вся природному некоему вещей сих недоумению. Веждь же о сем опасно: аще общения ради с еретики в священнодействе отгоняется действуяй благодати священства, коль же паче в неимущих благодати священства ищай благодати священства? Кую бо благодать священства в себе иконоборцы, толикими ересьми застаревшии, имели и чим в рукоположении Тарасия святаго пользовали бы тогда? Не могуще бо в себе благодати священства имети, како иным преподадут? Рцы ми: где сей святый Тарасий Духа благодать в священнодейство прия? Еда, по тебе, от иконоборцев? Или без Духа благодати осмь лет, по вас, Тарасий до седьмаго Вселенскаго собора священнодействовал? Аще ли в Дусе священнодействовал тайны, яви ми, где прия той? Ибо во иконоборцех не бяше Духа Божия, ниже тайны в них совершенно бываху, яко же подобает. Тайны бо святыя церкве посему тайны, яко видим на трапезе лежащ хлеб, тайна же сущее Тело Христово; видим во святей чаши вино, по тайному же самая Христова кровь. Тако же видим воду на крещении, ничто же ино, токмо тела омывание; тайно же порождение наше во Христа знаем. Подобне же и о прочем есть глаголати. Но сия что творит? Не человек, но самаго пришествие Святаго Духа, Его же иконоборцы отнюдь не имеша. И како бы у них Тарасий священства тайну прияв, в Дусе бы был и кия бы тайны без Духа совершал? Но оставивше убо сие невежество, известными свидетельствы сия блядословия отринем сими: 1) Понеже Бароний велий под четверопрестольными подзиратель бяше, того ради и малейшее се, еже из мирскаго чина на престол патриарший абие Тарасию взыти, в подозрение положи, аки неправильно: како бы умолчал ему, аще бы от еретик рукоположился? 2) Паки той же пишет: "егда папа прия послания от царицы Ирины позывательная на собор, тогда отписа к Тарасию папа, хваля веру и исповедание его, возшествия же его на патриаршество от мирскаго чина не хваля, и не хотяше бы сие его возшествие подтвердити, аще не бы сим долгом преклонен был, яко да честь образов церквам возбранит". А о сем нимало в том воспомяне (еже бы ему и паче нужно отписати), яко от еретик рукоположен был. 3) Еще той же Бароний в лете Господнем 787-м пишет: "яко за еже Тарасий на седьмом Вселенском соборе рукоположенных иконоборными епископов для исповедания святых икон приятия и для истиннаго их покаяния, в лучшее умирение церкве святыя, во еже первою честию святых икон прославити, за сущее снисходительство прияти, в том же чине прият и благослови священныя тайны действовати, неции от святых отец, а наипаче Феодор Студит и Савва, хуляху Тарасия". Коль бы паче хулам и отвращению не был Тарасий достоин от отец, егда бы и сам хиротонию, от тех восприял бы? 4) Аще бы святый Тарасий от иконоборных еретиков поставлен был, то кая бы се истина была, под отрицанием и клятвами рукоположенных в церкви приимати, а сам от святых отец собора не прият под таковым отрицанием ересей был? Понеже у всех историописателей не пишется, еже бы отцем Тарасия, аки от еретик ставленнаго, приимати. Тем же ложное сие смышление и несогласное разуму истории сие умствование о Тарасиеве рукоположении, аки бы от еретик хиротонисан был; но истина есть вещь и согласная историям и действам соборным, яко от православных епископов рукоположен бысть.

От того же Тарасиева жития о Павле патриарсе исповеднике.

Разговор 5-й.

Пришедый: И како же Павел прежде Тарасия в патриархи Царя-града от сих иконоборец поставлен бысть, и действоваше вся приличия патриаршая, и доныне есть и глаголется патриарх, аще и рукою еретическою бысть патриарх? Познавается бо отсюду, яко аще и не подобне соборныя церкве, однакоже не может быти просто (еретическое рукоположение), но некоего освящения виновно. Аще бы не сице, чего ради тако глаголатися? Кий ответ на се можеши показати?

Аз же: Сей твой подлог наипаче хощет ми о Тарасии утвердити истину.

Пришедый: И коими винами сего моего подлога хощеши о Тарасии утвердити?

Аз же: Сими хощу утвердити: понеже сей Павел, приим рукоположение от иконоборец надеждею сею, да искоренит иконоборную ересь, аки глава сущи духовнаго правления; но не содеяся по его тако: тем же, аки согрешив надежды, отречеся сего чина же и действа, и восприя о том покаяние.

Пришедый: Павел не о том каяся, что от иконоборец рукоположен бяше; но о том, что на иконоборство подписася.

Аз же: Се ми есть на низложение твое помощь, еже рекл еси, яко подписася на иконоборство. Тем же вопрошу тя: скажи ми время подписания сего?

Пришедый: Мнение мое есть о сем, яко при некоих соборех подписатися ему.

Аз же: Во время возведения на епископский престол взыскуется ли у хотящаго ставитися исповедание веры?

Пришедый: И зело.

Аз же: Возмем же от сего разум сей: егда иконоборцы хотяху Павла рукоположити на патриаршество, тогда, по обычаю церковному, взяша у него обещание во исповедании том, чтобы ему с ними поборати на святыя иконы, и по обету сему и подписку, о которой ему подписке и сенаторы с царицею пришедше припомянуша. Но сие убо, мною реченное, аки недостоверно есть ти; тем же вопрошу тя: во время поставления своего от иконоборец Павел дал ли тем еретиком на иконоборство обет?

Пришедый: Дал; понеже таков есть повсемственный обычай, яко в соборной церкви, тако и в еретицех.

Аз же: И аще убо повсемственно есть таково, да в коейждо вере и согласии прежде поставления во епископы брати обеты, да тако мудрствует и учит: и посему дал ли и Тарасий в поставлении своем иконоборцем обет на иконы по их обычаю?

Пришедый: Аще глаголати достойно, что Тарасий от иконоборец рукоположен, то без исповедания веры не мощно поставитися от тех.

Аз же: И аще Тарасий по иконоборной ереси творил исповедание веры: то убо Тарасий в том еретичестем исповедании и веры отречеся (приидет по вас)?

Пришедый: Никако; за повольную бо ему власть от прежняго совета свободно ему и православное исповедание пред иконоборными архиереи творити.

Аз же: Архиереи, кои (по мнению твоему) Тарасия ставили, иконоборнаго ли исповедания бяху?

Пришедый: Иконоборнаго.

Аз же: И како убо се, – хотяй Тарасия рукоположити иконоборнаго бяше исповедания, а Тарасий, хотяй от того рукоположитися, православнаго исповедания бяше! И что между ими таковое странное явится тогда? Слушаяй Тарасиево исповедание еретик бяше и еретическаго исповедания: а исповедание пред ним глаголяй православен, и православное исповедание глаголяй! Тем же вопрошу тя: кия ради вины пред рукоположением творится исповедание веры?

Пришедый: Для известия мудрования того, согласное ли той церкви имать, да не волк вместо пастыря стаду Христову введен будет.

Аз же: Что же, – аще хотяй рукоположитися несогласно исповедание изглаголет рукополагателю, будет ли его той рукополагати?

Пришедый: Не будет.

Аз же: Како же ты прежде рекл если, яко Тарасий пред иконоборным архиереем православное и несвойственное еретику исповедание творил, и той аки бы оно слушал и Тарасия рукоположил?

Пришедый: Тако есть.

Аз же: И чего ради тако есть? – рцы ми.

Пришедый: Яко иконоборная ересь уже преставаше.

Аз же: И аще тогда уже преставаше ересь иконоборная и упадаше, и иконоборцы укрощахуся: то почто Павел с престола сшел? Не малаго удивления сия ответствия твоя суть достойна, яко Павел, восходя на престол патриарший, притворно подчинися лютости иконоборства, хотящь ересь како-либо истребити, а егда зря лютое се укрочаемо, с престола сниде, и идеже бы хотяше падение свое загладити залога своего исполнением, ту тощ отъиде, знак имея неразумия. Но не тако убо, не тако; но паче знаком отчаяния исправы отъиде. И аще Павел виною сею понужден отъиде, то како хотяше иконоборный архиерей, слушав православное исповедание, поставити Тарасия в Царе-граде патриарха? Вещь сия странна и неимоверна, и паче утверждает поставление Тарасиево от православных.

Пришедый: Оставим уже то глаголати, аки бы Тарасий пред иконоборцем православное иеповедание глаголал; но речем то, негли по глаголу Павлову исповедание иконоборное дал за надежду исправления.

Аз же: И аще иконоборное исповедание иконоборцем дал, убо и подписался под иконоборство, и тако самое отступление Тарасий сотворил; и нужда бы в его святость покаянием и исповеданием православия то пред собором исправити. Но яко иконоборнии епископи ему на соборе исповедание православия творили, а Тарасий никому: убо и не бысть в падении иконоборства Тарасий, яко же Павел.

Пришедый: Чего же ради Павел от иконоборцев поставлен в патриархи, а церковь его нарицает патриархом? Зри августа 30.

Аз же: Материи ради и формы еретическаго тайнодейства, сиречь возложения рук на главу хиротонисуемаго и приглашения словес во время рукоположения, вси и в еретиках поставляемии глаголются быти иереи и архиереи; обаче еретичестии глаголются, аще не покаются; аще же покаются от ереси, и тогда возглаголются архиереи еретическое то ставление имущии, действовати же по тому священная не могут, аще от православнаго архиерея власти благословением на священнодейства не приимут. Ибо то подает едина, совершающая священства, Святаго Духа сила, коея еретицы отнюдь не имут, но токмо соборныя церкве архиереи имут. И да реку ти о сем уподобительне: зри ми скуделъника, из вещества и вида сосуд содевающа; вещество его есть глина, а вид его есть сосуд соделанный; обаче сице показанный сосуд имя свое носит; а без огня совершенное свое действо явити не может, яко же и еретическая хиротония, имя носящи, без Духа Святаго не покажет своего действа совершенно, без совершительныя силы, о чем довольно выше рехом.

Следующая часть