Сочинения Ивана Алексеева († 1776) Разговоры о разнствии между приемлющими настоящих иереев и не приемлющими. Разговоры 8.

О Феликсе, о Евдоксии и о Анатолии.

Разговор 8-й.

Пришедый: Благодарен есмь за твою толикую ко мне приязнь, яко одолжити мя в разговорах сих изволил еси любовию твоею; но понеже сими отвлекох аз время твое, упраздних от делания твоего потребна, буди же за сие тебе милость Божия во оставлении долгов твоих. Однако же еще имам не вопрошено в себе нечто, и о том, прошу, скажи ми. Евдоксий патриарх цареградский не токмо от ариан рукоположен бысть, но и самый ересиарх арианский, такожде и Феликс, аще сам и православен, обаче не токмо арианское прия поставление, но и прелюбодейно, живу сущу Ливерию папе, на его место в Рим рукоположися, Диоскор же постави Анатолия на Константинопольский патриарший престол: и вси сии в еретичестей хиротонии действоваху. Скажи ми, – прошу тя, – скажи ми вину попущения сего.

Аз же: О сем убо Феликсе и Евдоксии потребно разумети сие. Первое: яко еще не бяше тогда никоего уставления соборнаго о разнстве православных со арианы, аще по некоих местех и разнства некая бяше с сими, ибо еще на посредстве бяше сие и на общем увещании, яко же читаем. Второе: яко Феликс на Римский престол аще и рукоположен вместо Ливерия в папы, но римляне, ревнители сущии, не припустиша его до себе священнодейством [священнодействовати], дондеже Ливерий папа окаляся арианским некоим исповеданием в вере, тако же и подписанием на изгнание Афанасия Великаго. И о сих двух, о Феликсе и Евдоксии, сокращенно глаголю: прежде соборнаго устава вся сия бысть, по коему неуставлению и Василий Великий Уалента царя арианина на общую молитву со христианы в церковь припусти, но о сем оправдает его Лаодикийский поместный собор правилом шестым, яко в том Василий не погреши, яко не бе о том еще правила; последи же сих случаев вся сия святыми соборы запретися, и под судом Божиим будет преступаяй пределы отец своих. О Анатолии же (речем): аще и от Диоскора, ересь имуща, рукоположися, но сия еще в нем бяше скрыта, и прежде еще соборнаго суда. Но о сем в разговоре о Нестории довольно речеся. А наипаче и сам Бог во гресех наших долготерпеливно исправления нашего ожидает, яко же и о содомлянах ко Аврааму рече: глас вопля их вниде во уши Господа Саваофа, и иде соглядати их, аще тако есть по воплю их. Сему последует в падениих и церковь Христова: не на казни, но к милости паче взирает, о чем уже бяше. Прочее же, вечеру уже сущу, час приспе упокоения трудов и сократити сия возвещает глаголы.

Пришедый: Благодарю Господа Бога моего, сотворшаго мне милость, во еже приити мне на сия разговоры, во вся нужнейшая нас обстояния, и в требующихся ми восприяти решения: от давных бо лет желах и просих у Владыки моего, да даст мне известнейше и по тонку о сем уведати. Аще и случахуся кия где разговоры; но не бяше тако, яко же ныне, в неже самая живая благодать Божия настави и подвиже мя, за кое Его мне исполнение во благих желания моего буди честь и слава и поклонение благодарное всегда и ныне. Не мал убо воистину в сем случаи извет о долготерпении Божии во гресех моих, яко не забвенно теми прошение мое учини, приводя мя к чувству спасения моего, яко не презирает и грешников мольбы, но из всех причин извещает нам свою благость и позывает ко обращению. Буди благословенно имя Его вовеки, яко напитал есть душу тощу и насытил душу алчущу! Но яко же и тя, о друже мой, преутружденна и упражнена беседою моих словес во испытании сотворих: сего ради у Господа Бога прошу, да подаст ти Той награждение тщеты времене сего, и да сотворит прилог к смыслу твоему и да разжет сердце твое в горняя, яко много пользовал еси душу мою.

Аз же: Да не позазрит твое разсудительное невежества словес моих! Ибо аз человек о плоти пекийся, и непрестанными суетами объят есмь, и не имый добраго знания каковых-либо учений, ниже во чтении книг довольное упразнительство имый, откуду бы чистейши и явственнейши что довести и указати; но свыше мене зде дерзнух, на помощь Божию взираючи, к сим же и разумея, яко ничто полезнейши быти может, паче же в настоящее сие время, яко между нами о писании святом беседа, егда аз вопрошаю, ты же мне отвещаеши. Паче сего ничто же есть в житии сем радостнейше, и сия есть душевная пища, всяк мед превосходящая. Прочее да даст ти Господь Бог в приятии семен духовных возрастити пдоды благия, и себе и нас в гладе жития нашего напитати!

И тако, лобзавше друг друга, разыдохомся.

V.

О пренесении честных мощей святаго Николы Чудотворца,

на кую повесть ссылаются некия о приеме попов своих, аки бы на том пренесении папа Римский был, оправдание, яко не бяше.

По многих о иерействе вашем свидетельствах несвойственнаго разума приводится вами на среду из книги Жития Николы Чудотворца от пренесения того мощей слово, глаголющее на том пренесении быти призывану греческими епископы римскому папе отступнику, откуду крепкою надеждою вопиете: аще папу, отступника и сущаго еретика, грецы кроме нужде на пренесении святых сих Николиных мощей от Рима призваша, коль паче нам, в толикой нужде, мощно внешних рукоположенцев приимати. И сия суть пролазки, а не дверь.

Заграждение сея пролазки камением показания истины.

Пишет убо Бароний, яко гречестии пастыри разгласиша папежев латин в ересех быти лета 863-го, а наипаче от лета 1054-го, – сицевых ересей: 1-я) на опресноках служат, 2-я) удавленину ядят, 3-я) брады бреют, 4-я) суботы постятся, 5-я) нечистое животно ядят, 6-я) мнихи свиныя мяса ядят, 7-я) пост великий недобре творят, 8-я) в сырныя недели мясо ядят, 9-я) Духа Святаго и от Сына исходити глаголют, 10-я) брак священства хулят, николаитами зовут, 11-я) от родных братий своячин поемлют в жены, 12-я) на мше при окресноце друг друга объемлет и мир ему дает, 13-я) епископи перстни на руках носят, 14-я) епископи на войну исходят и своею рукою неприятелей убивают. И сия ереси до лета сего 1086-го (в неже Николины мощи пренесены) в латинах явишася. Тем же гречестии патриарси с прочими треми восточными патриархи за богопротивныя ереси латин непреклонных общим судом (клятве предаша). Предаде клятве папу и последующих ему Фотий патриарх Царя града в лето 867-е; Сергий же патриарх не токмо папу прокля, но и из книг память его изглади в лето 1054-е. Но и папа некий Марин, в лето 882-е, прокля Фотия Цареградскаго патриарха и дела его. И от сего времени преста конечно со греки римляном мир, и един на другаго неусыпную брань возъимаху. И Бароний нача о восточных во описании преставати, яко гневен. Ведати же зде и се подобает, яко Бар град епархия Цареградскаго патриарха есть, в православии суща, в нем же мощи святаго Николы положени быша. Тем и дивитися странному сему извещению приходит: патриархи Цареградстии папу за вышереченныя ереси проклинают, а барстии, подчинения Цареградскаго, того проклятаго в действо общаго служения и во святыню некую приемлют. Несть ли се раскол епархии и к самим себе несогласие? Ибо тогда Фотий не токмо к восточным патриархом писа, позывая их на тое проклятие папежев, но и к своим подчинительным епархиям, да соберутся. И сего позывания послании бяху в лето 863-е; дело же проклятия исполнилось 867-го. А Сергиево пап изглаждение и проклятие в лето 1054-е бяше, за мало до сего пренесения мощей. Зде же, аки забывше проклятие свое соборное на папу, на священнодейство позывают уже проклятаго ими: вещь есть великаго сомнения, и вам самим, приводящим сия, к действу неупотребительно сих ради вин:

Первая вина. Понеже вы своих иереев во отречении новин и во обете древняго предания святых хранения приемлете; папа же на оное пренесение от греков позван бяше не во отречении своих латинских ересей, ниже во обете греческаго благочестия ко греком прииде, но во своем суще зломудрии тех ересей: тем же и не имать к себе указания подобна на приятие ваше попов.

Вторая вина. Аще в таковом лице своих ересей на пренесении мощей папино бытие годствует вам на образец приятия вашего иерейства: то употребляйте подобно тому, сиречь попов таких приимайте, кои бы суще новаго учения были и во всех артикулах предания новаго же, и в таковом их новом залоге вся священнодействуемая ими за сущую святыню приимите от них, и тако тогдашняго бытия на пренесении папы образ сущаго того дела на вас познается. Ибо папа в латинских ересех греками (по истории) на пренесении прият бяше: и вы, в новинах попа приемлюще, того дела хранители будете.

Третия вина. Догматы церковныя глаголются быти догматы страшныя, и не глумитися ими подобает, но со страхом теми спасения искати. Зрите же, яко догматы сии всякаго епископа молящагося и службу творящаго со еретики священства извергают. Но аще (по вас, или по той истории) епископи гречестии на пренесение оное мощей еретика суща папу к служению сему призваша: убо зде единому чему отложену быти подобает, – или правилам, запрещающим с еретики службы и молитвы творити, упразднитися, или, тыя правила соборныя храняще, тако поступающия Цареградскому патриарху из санов священных изврещи подлежит, яко ведуще папу соборне отлучена и проклята, на службу Божию прияша.

Четвертая вина. Толикий святый сей Никола бяше ревнитель благочестия, егда еще живый на земли ненавиде еретиков, яко Ария еретика не возмощи ему стерпети на Сына Божия хулы, ныне же больше уже сподобленный соединения с Богом, востребовал бы над свыше богословящих толикаго богохульника на пренесение тела своего и общество службы Божия верным со зловерным видети! И кое се богоприятство? Ибо нецыи мниси монастыря Ксиропотама славнаго, токмо приемше иногда во общество папежев, с громом и шумом великим восколебася земля и пожре вся здания монастыря, и мнихи и вся сущая в нем, и бысть им гроб страшный и ужаса всех зрящих объятый. Читай о сем историю печатную о Флоренском соборе. Зде же во общество приятия папы дело явися (по вас) и благоприятно, и угоднику Божию Николе требовательно, и вам во образец годное.

Пятая вина. Глаголете, яко сие бытие папы на пренесении мощей в печатной книги положено: и како не верите ему? Отвещаю. Несть дивно, не досмотрившеся с греческими о том писмами, напечатати, ибо не Бог, ни ангел при том деле справы досматривал, но человек, ему же что в чувстве, то и исправляет, а что чувством ведати не достиг, то и не возмог. Сия бо есть история; но двоими вещьми дозирается во истине, – или взглядом на каноны церковные и естественный тех разум, или согляданием других языков на подобное описание истины. Аще ли из сих что оскудеет, всячески в наборе том погрешит. Но сие несть достойно гаждения, ибо в конце печатных книг многажды о погрешностях прозба прощения полагается, да идеже что от недознания содеяся, да оставится в том, глаголюще: яко и вы тою же немощию обложени есте, и в чем недостаточно, исправите, а не клените. Тем же последующии сим искуснейшии в том исправщики в печатном дозирательстве исправиша сию о пренесении историю, и не напечаташа то, аки бы на том пренесении святых мощей папа еретик был, но ясно сопротивное разуму сие отложили, яко в Прологе Иосифовском, тако и в Минеях-Четиих, и в книге Полинодии, составленной богомудрым Захарием архимандритом Киевопечерским. Но вам не приятна тако исправленная история, яко неисправна, не разсуждающе, яко тако ратницы истине творят: обычно бо емлется лучше вера многим, неже единому.